महरालाई थुनामै राखेर अनुसन्धान गर्न तीन दिनको समय थप

काठमाडौं - संसद सचिवालयकै महिला कर्मचारीमाथि बलात्कार गरेको अभियोगमा थुनामा रहेका निवर्तमान सभामुख कृष्णबहादुर महरामाथि अनुसन्धानका लागि अदालतले थप तीन दिनको म्याद दिएको छ।

काठमाडौं जिल्ला अदालतमा मंगलबार भएको वहसपछि महरामाथि अनुसन्धान गर्न अदालतले थप तीन दिनको म्याद दिइएको हो।

जिल्ला न्यायाधीश दिपक दाहालको ईजलासमा बहस भएको थियो। महराको तर्फबाट बरिष्ठ अधिवक्ता रमण श्रेष्ठ र अधिवक्ता मुरारी सापकोटाले बहस गरेका थिए।  

सरकारी वकिलका तर्फबाट बहस गर्दै उमाकान्त पौडेलले महरालाई १३ दिन हिरासतमै राखेर अनुसन्धान गर्न म्याद थप गर्न माग गरेका थिए। उनलाई यसअघि नै १० दिन हिरासतमा राखिसकिएको छ। १९ गतेबाट १० दिनको समय सकिसकेको छ। अब तीन दिन मात्र बाँकी छ। 

संसद सचिवालयमा कार्यरत रोशनी शाहीलाई महराले असोज १२ गते बलात्कार गरेको जाहेरी परेपछि महरालाई १८ गते पक्राउ गरिएको थियो। महरालाई १ बजे अदालत पुर्‍याइएको थियो। प्रहरीले मंगलबार उनलाई नर्भिकबाट सिधै जिल्ला सरकारी वकिलको कार्यालय पेस गरेको थियो। सरकारी वकिलको कार्यालयमा थुनछेक बहस पछि  महरालाई म्याद थपका लागि काठमाडौं जिल्ला अदालत पेस गरिएको थियो।

पक्राउपछि महरा सिंहदरबार वृत्तमा प्रहरी हिरासतमा रहँदै आएका थिए। तर स्वास्थ्यमा गडबडी भएपछि उनी नर्भिक अस्पताल भर्ना भएका थिए।