जनकपुरधाम-प्रदेश २ का मुख्यमन्त्री लालबाबु राउत आफै झाडु बोकेर सरसफाइ गरेका छन् । गान्धी जयन्तीको अवसर पारेर मंगलबार जनकपुरमा आयोजना गरिएको वृहत्त सरसफाइ कार्यक्रममा मुख्यमन्त्री राउत झाडु बोकेर सडक सरसफाइमा जुटेका हुन् ।
महात्मा गान्धी स्मृति प्रतिष्ठानको आयोजना तथा सेभ द हिस्टोरिकल जनकपुरको सहकार्यमा जनकपुरको भानु चोकदेखि मुरली चोकसम्म करिब तीन किलोमिटर सडक सरसफाइ गरिएको छ ।
मुख्यमन्त्रीदेखि नगर प्रमुखसम्म पटकपटक सरसफाइका लागि आफै झाडु बोकेर सडकमा आएपनि यहाँको फोहोर व्यवस्थापन हुन सकेको छैन् । प्रमुख सरोकारबला निकाय उपमहानगरपालिका कार्यालयले चासो नदिँदा जनकपुर सफा हुन नसकेको स्थानीयवासीको भनाइ छ ।
कुनै विशेष अवसरमा मात्र झाडु चलाएर जनकपुर सफा हुन नसक्ने र यसका लागि उपमहानगरपालिका कार्यालयले दीर्घकालीन योजना ल्याउनु पर्ने स्थानीय सुशील कर्ण बताउँछन् । यद्यपी विशेष अवसरहरुमा गरिने यस्ता कार्यक्रमहरुले सर्वसधारणका साथै सरोकारबलाहरुलाई जागरुक बनाउने काम गरेको उनको भनाइ छ ।
गान्धी जयन्तीको अवसरमा आयोजना गरिएको सरसफाइ कार्यक्रममा बोल्दै मुख्यमन्त्री राउतले जनकपुर प्रदेशको राजधानीमात्र नभई हिन्दु धर्मावलम्वीहरुको आस्थाको केन्द्रसमेत रहेकोले सफा र स्वच्छ राख्न स्थानीयवासीलाई आग्रह गरे । जनकपुर सफा भए सकारात्मक सन्देश प्रभाह भएर धार्मिक पर्यटनमासमेत टेवा पुग्ने उनको भनाइ थियो ।
सरसफाइ कार्यक्रममा मुख्यमन्त्री राउतसहित सफाइ अभियन्ता तथा प्रदेशसभा सदस्य रामअशिष यादव, विभिन्न क्षेत्रका प्रवद्ध व्यक्ति, विभिन्न विद्यालयका विद्यार्थी, स्थानीय युवाहरुको सहभागिता रहेको थियो ।
प्रकाशित: Dec 31, 2017| 18:23 आइतबार, पुस १६, २०७४