पेरिस (एजेन्सी)-लिग वन अन्तर्गत शनिबार राति भएको खेलमा पेरिस सेन्ट जर्मेन (पीएसजी) ले निसलाई ३-० ले पराजित गरेको छ । यस जितसँगै पीएसजीले लिगको सुरुआती आठ लिग खेलमा लगातार जित हासिल गर्दै कीर्तिमान बराबरी गरेको छ । यसअघि सन् १९६०–६१ सिजनमा एएस मोनाकोले पनि सोहि रेकर्ड कायम गरेको थियो ।
पीएसजीको शत प्रतिशत नतिजालाई निरन्तरता दिन नेयमारले दुई तथा एनकुन्कुले एक गोल गरे । खेलको २२ औं मिनेटमा ब्राजिलियन सुपरस्टार नेयमारले पेनाल्टी क्षेत्रबाहिर बाट गरेको प्रहार गोलमा परिणत भएको थियो ।
दोस्रो हाफको सुरुआतमै एनकुन्कुले गोल गर्दै अग्रता देब्बर पारे । ५९ औं मिनेटमा विलयन सिप्रिएन दोहोरो पहेंलो कार्ड खाँदै मैदान बाहिरिदा निस १० खेलाडीमा सिमित भएको थियो । इन्जुरी समयमा केलियन एमबाप्पेको पासमा नेयमारले सहज गोल गर्दै जित पक्का गरे ।
पीएसजी यस जितसँगै शीर्ष स्थानमा ९ अंकको अग्रता बनाउन सफल रहेको छ । लिगको साविक विजेता रहेको पीएसजीलाई प्रशिक्षक थोमस टुचेलले अपराजित बनाउने लक्ष्य लिएका छन् । टुचेलले शनिबार स्टार फरवार्ड एडिन्सन कभानीलाई बेन्चमा राखेका थिए ।
पीएसजीले यसै साताको मध्यमा च्याम्पियन्स लिग र अन्त्यमा लिग वन अन्तर्गतका खेलहरु खेल्नेछ । पछिल्लो सिजन उचित विश्राम नपाएका कारण नेयमार र एमबाप्पे घाइते भएका थिए ।
प्रकाशित: Dec 31, 2017| 18:23 आइतबार, पुस १६, २०७४