फाइल तस्बिर
जनकपुरधाम-प्रहरीले धनुषाबाट हतियारसहित सात जनालाई पक्राउ गरेको छ । धनुषाको विदेह नगरपालिका ठाढी झिझाबाट प्रहरीले उनीहरुलाई नियन्त्रणमा लिएको हो ।
पक्राउ पर्नेहरुमा विदेह नगरपालिका-१ का नरेश ठाकुर, श्यामसुन्दर ठाकुर र रविन्द्र ठाकुर, कमला नगरपालिका ८ का राजगीर महतो र सत्रुधन ठाकुर रहेको धनुषाका प्रहरी उपरीक्षक गोविन्द थपलियाले जानकारी दिए । पक्राउ परेका दुई जनाको नाम खुल्न नसकेको उनले बताए ।
उनीहरुको साथबाट दुई थान पेस्तोल र आठ राउन्ड गोली बरामद भएको प्रहरीले जनाएको छ । उनीहरुको विषयमा थप अनुसन्धान भइरहेको जिल्ला प्रहरी कार्यालय धनुषाले जनाएको छ ।
यसैगरी धनुषाकै नगराइन नगरपालिकाबाट प्रहरीले अवैध चाँदीसहित एक जनालाई नियन्त्रणमा लिएको छ । नगराईन नगरपालिका-२ डेवडिहाबाट प्रहरीले स्थानीय अजयकुमार साहलाई पक्राउ गरेको प्रहरी उपरीक्षक थपलियाले जानकारी दिएका छन् ।
शंकाको आधारमा प्रहरीले चेकजाँच गर्दा उनको साथबाट चाँदी बरामद भएको प्रहरीले जनाएको छ । थप अनुसन्धानका लागि साहलाई चाँदीसहित भन्सार कार्यालयको जिम्मा लगाइएको छ ।
प्रकाशित: Dec 31, 2017| 18:23 आइतबार, पुस १६, २०७४