९ वर्षिया बालिकाको शंकास्पद अवस्थामा शव भेटियो

कास्की- घरबाट हराएको १२ घण्टा नबित्दै पोखरा कुदीकी नौ वर्षीया बालिका श्रीया सुनार मृत अवस्थामा फेला परेकी छन् । 

उनी घर नजिकैको सडक छेउमा मृत फेला परेको जिल्ला प्रहरी कार्यालय कास्कीका प्रमुख प्रहरी उपरिक्षक ओमबहादुर रानाले नेपाल समयलाई जानकारी दिए । 

श्रीया सोमबार साँझ घरबाट हराएकी थिइन् । परिवारका सदस्यले छोरी घरमा नभएपछि वरपर खोजी गरेका थिए । नजिकैका आफन्तकोमा पनि छोरी नभएको पाएपछि उनीहरुले प्रहरीलाई खबर गरेका थिए । 

बालिका हराएको खबर पाएपछि खोजी कार्य तीब्र रुपमा सञ्चालन गर्दा उजुरी परेको भोलिपल्ट बिहान सडक छेउमा मृत अवस्थामा फेला पारिएको रानाले बताए । 

घटना स्थल पुगेका एसपी रानाले बालिकाको शव शंकास्पद अवस्थामा फेला पारेको र घटना बारे अनुसन्धान जारी राखेको बताए ।