काठमाडौं-असोज दोस्रो साताबाट सुरु हुने शहिद स्मारक ‘ए’ डिभिजन लिग फुटबलको उद्घाटन खेलमा एनआरटी र विभागीय टोली त्रिभुवन आर्मी क्लब भिड्ने भएका छन् ।
अखिल नेपाल फुटबल संघ (एन्फा) ले बुधबार सार्वजनिक गरेको खेल तालिका अनुसार उद्घाटन खेलमा एनआरटी र आर्मीले प्रतिस्पर्धा गर्ने भएको हो । माघ १६ सम्म चल्ने उक्त लिगको उद्घाटन खेल सातदोबाटो स्थित एन्फा कम्प्लेक्स मैदानमा हुनेछ ।
उद्घाटन खेल अपरान्ह ३ बजे सुरु हुने एन्फाले जनाएको छ । पहिलो दिन एक मात्र खेल हुनेछ भने दोस्रो दिनबाट दुई खेल हुनेछ । लिगमा १४ ‘ए’ डिभिजन क्लबले खेल्ने छन् ।
राउण्ड रोविन लिगको आधारमा हुने प्रतियोगितामा कुल ९१ खेल हुनेछ । पहिलो चरणका ७ खेल मध्येमा असोज १३ एनआरटी क्लब र त्रिभुवन आर्मी क्लबबीच प्रतिस्पर्धा हुने छ ।
असोज १४ गते ब्रिगेड ब्वाइज क्लब र मनाङ मर्स्याङ्दी क्लब, असोज १४ गते मछिन्द्र क्लब र च्यासल युथ क्लब, असोज १५ गते फ्रेन्ड्स क्लब र थ्री स्टार क्लब, असोज १५ गते जावलाखेल युथ क्लब र नेपाल पुलिस क्लब, असोज १६ गते हिमालयन शेर्पा र एपीएफ क्लब तथा असोज १६ गते सरस्वती युथ क्लब र संकटा युथ क्लबबीच प्रतिस्पर्धा हुने छ ।
लिगको विजेताले ५० लाख पाउने जानकारी दिएको हो । यस्तै लिग विजेता टोलीले एएफसी एसियन कप फुटबलमा सहभागिता जनाउन पाउनेछन् । लिगको उपविजेताले ३५ लाख र तेस्रोले २५ लाख पाउने जनाएको छ ।
त्यस्तै लिगको चौथो टोलीले १५ लाख, पाँचौ टोलीले ७ लाख र छैटौंले ५ लाख पाउनेछन् । फेयर प्ले टिमले एक लाख पाउने छन् । प्रत्येक खेल जिते बापत एन्फाले क्लबलाई ५० हजार तथा म्यान अफ दि म्याच खेलाडीलाई १० हजार दिने छन् । लिगको तयारीको लागि एन्फाले क्लबलाई २० लाख उपलब्ध गराउने छ ।
प्रकाशित: Dec 31, 2017| 18:23 आइतबार, पुस १६, २०७४