जनकपुरधाम- प्रदेश २ सरकारका मन्त्री र सरकारमा संवद्ध दलहरुले संविधान दिवसको विरोध गरिरहेपनि सरकारले संविधान दिवस मनाएको छ । प्रदेश सरकारले वृक्षारोपण गरी संविधान दिवस मनाएको हो ।
प्रदेश सरकारकै निर्णय अनुसार संविधान दिवसको अवसरमा वृक्षारोपण कार्यक्रम गरिएपनि मन्त्रीहरु उपस्थित भएनन् । मुख्यमन्त्रीसहित मन्त्रीहरु संविधान दिवसको अवसरमा आयोजना गरिएको वृक्षारोपण कार्यक्रममा उपस्थित नभएपछि प्रदेशका प्रमुख सचिव राजेश्वरमान सिंहले कार्यक्रमको अध्यक्षता गरेका थिए ।
२८ भदौमा बसेको मन्त्रीपरिषद बैठकले वृक्षारोपण गरेर संविधान दिवस मनाउने निर्णय गरेको थियो । प्रदेश सरकारको निर्णय अनुसार संविधान दिवसको अवसरमा वृक्षारोपण कार्यक्रम गरिएको मुख्यमन्त्री तथा मन्त्रीपरिषद कार्यालयका सचिव हरि फुयाँलले जानकारी दिए । वृक्षारोपण कार्यक्रममा विभिन्न मन्त्रालयका सचिव, उपसचिव, सुरक्षा निकायका अधिकारी लगायतका व्यक्तिहरुको उपस्थिति थियो । यस अवसरमा मुख्यमन्त्री आवास परिसरमा वृक्षारोपण गरिएको फुयाँलले बताए ।
संविधान दिवसबारे प्रदेश २ मा सत्तासाझेदार दलहरु दुई कित्तामा बाँडिएका छन् । सरकारको नेतृत्व गरिरहेको संघीय समाजवादी फोरमका अध्यक्ष उपेन्द्र यादवले संविधान दिवसको विरोध नगर्ने बताएका छन् । यद्यपी उनकै पार्टीका तराई–मधेश कमिटीका संयोजक रेणु यादवले ब्ल्याक आउट गरेर संविधान दिवसको विरोध गर्न आह्वान गरेकी छिन् ।
यता सरकारमा सहभागी अर्को दल राजपाले भने संविधान दिवसको विरोधमा कार्यक्रम गरिरहेको छ । राजपाले विरोध प्रदर्शन र साँझ ब्ल्याक आउट गर्न भनेको छ ।
प्रकाशित: Dec 31, 2017| 18:23 आइतबार, पुस १६, २०७४