दशैंको मुखमा फेरि बढ्यो इन्धनको मूल्य, केमा कतिले वृद्धि ?

काठमाडौं- नेपालीहरुको महानपर्व दशैँ नजिकिदै जाँदा सरकारले पुनः इन्धनको मूल्य बढाएको छ । नेपाल आयल निगमले सोमबार मध्यरातदेखि लागू हुनेगरी पेट्रोल, डिजेल, मट्टितेलमा मूल्य बृद्धि गरेको हो । निगमका अनुसार पेट्रोलमा दुई रुपैयाँ, डिजेल र मट्टितेलमा समान ३ रुपैयाँ बृद्धि गरिएको छ ।

निगमका प्रवक्ता वीरेन्द्र गोईतले अन्तर्राष्ट्रिय बजारमा पेट्रोलियम पदार्थको मूल्य बढेको भन्दै स्वचालित मूल्य प्रणालीअनुसार मूल्य बढाएको जानकारी दिए । उनकाअनुसार  पेट्रोल, डिजेल र मट्टितेलको साविकको खुद्रा मूल्य बढेको छ । जसअनुसार प्रतिलिटर पेट्रोलमा २, प्रतिलिटर डिजेल र मट्टितेलमा ३ रुपैयाँ बढेको छ ।

मूल्य बढेपछि काठमाडौंको नयाँ खुद्रा विक्रीमूल्य पेट्रोलको प्रतिलिटर ११४, डिजेल र मट्टितेलको १०१ पुगेको छ । हवाई ईन्धन र खाना पकाउने एलपि ग्याँसको मूल्य भने यथावत राखिएको छ ।

उक्त समायोजन पश्चात पनि निगम अझै घाटामा रहेको निगमका अधिकारीहरुको दावी छ । उनीहरुका अनुसार निगमलाई अझै पेट्रोलमा प्रति लि २.९२, डिजेलमा २.७२ र  खाना पकाउने एलपि ग्याँसमा प्रति सिलिण्डर ३०९.७९ घाटा छ । समग्रमा निगमलाई १५ दिनमा करीब ३१ करोड ६७ लाख घाटा हुने निगमको भनाइ छ । 

निगमकाअनुसार पछिल्लो १५/२० दिनमा अन्तराष्ट्रिय बजारमा पट्रोलियम पदार्थको मूल्य उल्लेख्य रुपमा बढेको तथा युयस डलरको तुलनामा नेपाली र भारतीय मुद्राको अवमुल्यन भएको र सोही मुताविक इण्डियन आयल कर्पोरेशनबाट १६ सेम्टेम्बरमा प्राप्त मूल्य बढेर आएकोले मूल्य विश्लेषण गरी समायोजन गरिएको हो । 

यो समायोजन पश्चात भारतको रक्सौल भन्दा नेपालको वीरगंज तर्फको सिमा मूल्यमा पेट्रोलमा प्रतिलिटर २९.४४ र डिजेल २८.४४ ले नेपालतर्फ सस्तो हुने निगमको दावी छ ।

इन्धनको मूल्यवृद्धि भएसंगै यातायात ब्यबसायीले दशैँको मुखमा सवारी साधानको भाडा द।र बढाउने तयारी गरेका छन् । उनीहरुले पुरानै मुल्यमा यात्रु ओसार्न नसक्ने बताउँदै आएका छन् ।