धनगढी– नेपाली कांग्रेसको बिद्यार्थी संगठन नेपाल विद्यार्थी संघको पुर्वघोषित कार्यक्रम अनुसार शनिवार महेन्द्रनगर बन्द गरेको छ ।
निर्मला पन्तको बलात्कारपछि भएको हत्याको सत्य, तथ्य सार्वजनिकको माग गर्दै नेविसंघले घोषणा गरेको बिरोध कार्यक्रम अनुसार महेन्द्रनगरमा प्रदर्शन भएको हो । नेपाल विद्यार्थी संघले बिहिबारदेखि ३ दिने दबाबमूलक कार्यक्रम सार्वजनिक गरेको थियो ।
महेन्द्रनगरका बिभिन्न चौकमा टायर बाल्दै उनीहरूले महेन्द्रनगर बजार क्षेत्रमा नारावाजी गर्दै प्रदर्शन गरेका जारी राखेका छन् । घटना घटेको झण्डै दुइ महिना पुग्नै लाग्दा समेत न्याय दिलाउनका लागि सरकारले देखाएको लाचारपन तथा ढिलासुस्तीको बिरुद्धमा महेन्द्रनगर बजारका बिभिन्न चोकमा टायर बालिएका हुन ।
सडकबीचमै बसेर प्रदर्शन हुन थालेपछि यातायातका साधन सञ्चालनमा समेत अवरोध सृजना भएको छ । सरकारलाई हत्यारा पत्ता लगाउन दबाब दिनका लागि प्रदर्शन गरिएको नेविसंघका विद्यार्थी नेता किशोर जोशीले बताए ।
घटना भएको झण्डै दुई महिना भइसक्दा पनि दोषीको पहिचान गर्न नसकेको प्रहरी प्रशासन र सरकारलाई खबरदारि गर्न प्रदर्शन भइरहेको उनले बताए । यसअघि बिहिबार महिलाहरूले हत्यारा पत्ता लगाउन माग गर्दै रित्तो थाली बजाउँदै बजारमा प्रदर्शन गरेका थिए ।
हत्यारा खोजी गरिनुपर्ने भन्दै तीजका दिन महिलाहरूले कालो सारी लगाएर भीमदत्त बजार क्षेत्रको मदन चोकमा कालो तिज मनाएका थिए । बलात्कार पछि भएको हत्यामा प्रशासनले अलमल गरिरहेको आशंकामा शनिवार देशका अधिकांश ठाउँमा ‘निर्मलाका निम्ति न्याय’ अभियानले जनता भेला एवं प्रदर्शन भइरहेको छ ।
प्रकाशित: Dec 31, 2017| 18:23 आइतबार, पुस १६, २०७४