चर्को आवाज निकाल्ने जुनसुकै बाइक पनि नियन्त्रणमा लिइने

काठमाडौं- चर्को आवाज निकालेर ध्वनी प्रदुषण गर्ने जुनसुकै बाइकलाई पनि नियन्त्रणमा लिइ कारबाही गरिने भएको छ। 

करिब १५ दिनअघिदेखि शुरु गरिएको उक्त अभियानमा हालसम्म दुई सय ५० बढी त्यस्ता ठूलो ध्वनी निकाल्ने बाइक धनीलाई पक्राउ गरी कारबाही गरिसकिएको महानगरीय ट्राफिक प्रहरी महाशाखा प्रमुख एसएसपी वसन्त पन्तले बताए।
 
‘कुनै पनि ब्राण्ड तथा सीसीलाई नभइ ठूलो ध्वनि निकाल्ने जुनसुकै बाइक चलाउनेलार्इ धनीलाई पक्राउ गरि कारबाही गरिरहेका छौं,’ उनले भने ‘त्यस्ता ध्वनी निकाल्ने पल्सर, वुलेट, डुकाटी लगायतका जुनसुकै बाइक हुन सक्छ, जसले स्थानिय सर्वसाधारण, विद्यालय, यात्रुहरुलाई असर गर्दछ।’

उनका अनुसार कारबाहीअन्तर्गत शुरुमा एक हजार रुपैयाँ  जरिवाना लिने त्यति गरेपनि अटेर गरे पक्राउ गरेर सम्बन्धीत निकायमा बुझाइने छ।
  
पछिल्लो समय बाइकलाई मोडीफाई गरि समान्य ध्वनीभन्दा ठूलो ध्वनी निकाल्ने अथवा स्वत ठूलो ध्वनि निकाल्ने बाइकलाई चलाउन रोक लगाएको उनको भनाइ छ।

चर्को आवाज निकाली गुड्ने बाइकले विद्यार्थी, सर्वसाधारण नागरिकलाई सबैले प्रताडित गरेको भन्दै चौतर्फी गुनासो आएपछि महानगरीय ट्राफिक प्रहरी कडा रुपमा उत्रेको उनले नेपाल समयलाई जानकारी दिए।