काठमाडौं- राजधानीबाट प्रकाशित शुक्रबारका राष्ट्रिय दैनिक पत्रिकाहरुले विविध विषयलाई पहिलो प्राथमिकतामा पारेका छन् ।
नयाँ पत्रिका र कान्तिपुर दैनिकले प्रस्तावित प्रधानन्यायाधीश दीपकराज जोशीकै विषयलाई मुख्य समाचार बनाएका छन् भने अन्नपूर्ण पोस्ट्ले राजदूत सिफारिस निष्क्रिय हुने अवस्थामा पुगेको विषय प्रमुख खबर बनाएको छ ।
नागरिक दैनिकले भने सिक्टा सिँचाइमा भएको लापरबाहीका कारण आयोजना नै जोखिममा परेको विषयलाई विशेष खबर बनाएको छ । कारोबार दैनिकले भने प्रत्यक्ष वैदेशिक लगानीमा चीन सबैभन्दा अगाडी रहेको विषयलाई मुख्य समाचार बनाएको छ ।
आजको कान्तिपुर दैनिकले संसदीय सुनुवाइमा प्रस्तावित प्रधानन्यायाधीश दीपकराज जोशीको निर्णय प्रक्रियामा कांग्रेसले अल्झाउन उनीविरुद्ध महाअभियोग प्रस्ताव ल्याउने गरि सत्तारुढ नेकपा भित्र लविङ सुरु भएको खुलासा गरेको छ । संसदीय सुनवाई समितिको बैठक पटक पटक सरिरहेको र समितिभित्रको दुईतिहाइ मतलाई कांग्रेसले बन्धक बनाइरहे महाअभियोगसम्म जाने गरि नेकपामा छलफल सुरु भएको कान्तिपुरमा उल्लेख छ ।
सर्वोच्च आउँदै विवादित थिए जोशी शीर्षकमा मुख्य समाचार छापेको नयाँ पत्रिकाले २०७१ मा संसदीय सुनुवाइ समितिमा पहिलोपटक मतदान हुँदा ६७ मध्ये २५ सदस्य उनको विपक्षमा रहेको उल्लेख गरेको छ । यस्तै गाँजा तस्करी र वालिका बलात्कारमा जोशीको फैसलामाथि पुनरावेदन र सर्वोच्च अदालतले प्रश्न उठाएको नयाँ पत्रिकाले जनाएको छ । सरकारले सातै प्रदेशमा एक अन्तर्राष्ट्रिय विमानस्थल बनाउने घोषणा गरेको विषयलाई पनि नयाँ पत्रिकाले विशेष महत्वका साथ छापेको छ ।
आजको अन्नपूर्णले पूर्वप्रमुख निर्वाचन आयुक्त नीलकण्ठ उप्रेतीलाई राजदुत नियुक्तिका लागि गरिएको सिफारिस निष्क्रिय हुने अवस्थामा पुगेको र संघिय संसद्मा बल्ल विषयगत समिति गठन भएको विषयलाई प्राथमिकतामा पारेको छ ।
नागरिक दैनिकले भने सिक्टा सिँचाइमा भएको लापरबाहीका कारण आयोजना नै जोखिमलाई फलोअप गरेको छ । प्रकाशित खबरअनुसार पश्चिम मूल नहर अन्तर्गत १७.७ देखि ३५ किमिको बीचमा पर्ने नहरका अधिकांश ठाउँ भत्किने अवस्थामा पुगेको छ । नागरिकले प्रस्तावित प्रधानन्यायाधीश दीपकराज जोशीको निर्णय हुन नसक्दा न्यायसम्पादन नै प्रभावित बनेको खबर पनि एङ्कर न्यूजका रुपमा छापेको छ ।
प्रकाशित: Dec 31, 2017| 18:23 आइतबार, पुस १६, २०७४