डीएलएको अध्यक्षमा कोइराला र सिटौला प्यानलका अधिकारी निर्वाचित

नवलपरासी- नेपाली कांग्रेस निकट कानुन व्यवसायीहरुको संगठन डेमोक्रेटिक लयर्स एसोसिएसन (डीएलए) को अध्यक्षमा योगेगेन्द्र बहादुर अधिकारी निर्वाचित भएका छन् । निकटम प्रतिद्वन्द्वी सिताराम केसीलाई ९४ मतान्तरले पराजित गर्दै अधिकारी अध्यक्ष पदमा विजयी भएका हुन् ।

विजयी अधिकारी शंशाक कोइराला र कृष्ण प्रसाद सिटौलाको प्यानलबाट उम्मेदवार बनेका थिए भने पराजित केसी बरिष्ठ नेता रामचन्द्र पौडेलको प्यानलबाट उठेका थिए । सभापति शेरबहादुर देउवाको गुटबाट भने रामकुमार श्रेष्ठ र केदार कार्की अध्यक्ष पदको उम्मेदवार बनेका थिए ।  

नवलपरासीको गैँडाकोटमा भएको १० औं महाधिवेशनले बरिष्ठ उपाध्यक्षमा भने सुरेस पौडेललाई निर्वाचित गरेको छ । उनी पनि कोइराला र सिटौलाको प्यानलबाट उम्मेदवार बनेका थिए । कांग्रेसका शीर्ष नेताहरुको प्रत्यक्ष निगरानीमा निर्वाचन भएको थियो । 

सोमबार बिहान सार्वजनिक भएको मतपरिणाम अनुसार महासचिवमा लक्ष्मीदेवी दाहाल रावल, खुल्ला सचिवमा खड्गबहादुर बुढाथोकी , महिला सचिवमा विष्णु बस्याल र कोषध्यक्षमा शोभा खतिवडा कोइराला विजयी भएका छन् । 

यस्तै उपाध्यक्षमा तीन नम्बर प्रदेशबाट राजु कट्वाल, पाँच नम्बरबाट गोर्काा सिंह थापा निर्वाचित भएका छन् भने बाँकी प्रदेशबाट उपाध्यक्षमा निविरोध चयन भएका छन् । चार वटा प्रदेश र १ महिलासहित ५ जना उपाध्यक्ष निर्विरोध निर्वाचित भएका हुन् ।

महिला उपाध्यक्षमा शुष्मा बास्कोटा बराल, प्रदेश १ बाट मुरारी खड्का, प्रदेश २ बाट राजनप्रसाद दाहाल, कर्णाली प्रदेशबाट खड्गबहादुर सिजापति र प्रदेश ७ बाट दिलबहादुर जेठारा निर्विरोध निर्वाचित भएका छन् ।  

४३ पदका लागि भएको निर्वाचनमा १८ जना निर्विरोध निर्वाचित भएका थिए । निर्विरोध निर्वाचित हुने सदस्यहरुमा प्रदेश १ बाट अश्विनीकुमार भट्टराई, प्रदेश २ बाट सन्तोषकुमार पाण्डे, प्रदेश ५ बाट निर्मल गौतम, कर्णाली प्रदेशबाट दमनराज वम र प्रदेश ७ बाट उद्धवराज भट्ट रहेका छन् ।