जनकपुरधाम-नेपाली कांग्रेस १५ साउनमा सरकार विरुद्ध देशव्यापी विरोध प्रदर्शन गर्दैछ । विरोध प्रदर्शनलाई सफल र प्रभावकारी बनाउन कांग्रेसले जिल्ला जिल्लामा तयारी शुरु गरेको छ ।
धनुषा कांग्रेसले सरकार विरुद्ध हुने प्रदर्शनमा जनकपुरमा १५ हजारभन्दा बढी मानिस सडकमा उत्रिने दाबी गरेको छ ।
विरोध प्रदर्शनबारे जानकारी दिन नेपाल प्रेस युनियन धनुषाले आइतबार आयोजना गरेको पत्रकार सम्मेलनमा बोल्दै सभापति महेशशंकर गिरीले नगर, वडा तथा जिल्ला गरी सबै तपकाका नेता कार्यकर्ता सडकमा उत्रिने दाबी गरे ।
वर्तमान सरकार निरंकुश र लोकतन्त्रको विरोधमा अगाडी बढेकोले कांग्रेस आन्दोलनमा जान वाध्य भएको उनले बताए । वर्तमान संविधानमा सभामुख र उपसभामुख फरक फरक पार्टीको हुने स्पष्ट व्यवस्था रहेपनि वर्तमान सरकारले त्यसको खिल्ली उडाएको गिरीले बताए ।
प्रदेश २ का कांग्रेस संसदीय दलका नेता रामसरोज यादवले कांग्रेसको आन्दोलन जनताको पक्षमा रहेको उल्लेख गरे । वर्तमान सरकार दुई तिहाईको दम्भ देखाएर मुलुकमा अधिनायकवाद लाद्न उद्त रहेको उनले आरोप लगाए ।
प्रकाशित: Dec 31, 2017| 18:23 आइतबार, पुस १६, २०७४