नुवाकोट- नेपाली कांग्रेसका पुराना नेता विष्णुबहादुर आचार्यको शनिबार राति निधन भएको छ । पाचन ग्रन्थीको क्यान्सरबाट पीडित आचार्यको उपचारका क्रममा काठमाडौंको वीर अस्पतालमा निधन भएको हो ।
शनिबार साँझ एक्कासी बान्ता हुने र शरीरमा असजिलो भएपछि उपचारका लागि अस्पताल पुर्याइएका उनको राति निधन भएको आचार्यका सहकर्मी तथा नेपाली कांग्रेसका पूर्वजिल्ला सभापति ध्रुव अधिकारीले जानकारी दिए ।
विसं २०३३ देखि काँग्रेसको राजनीतिमा होमिनुभएका आचार्यलाई काँग्रेसले पञ्चायतविरुद्ध ‘आउट पोष्ट’ कब्जा गर्ने नीतिअनुरुप २०४४ सालमा काँग्रेसका तर्फबाट विदुर नगरपालिकाको निर्वाचनमा प्रमुखमा उम्मेदवार बनाएको थियो । पार्टी जिल्ला कमिटीका सदस्य, सहसचिव र सचिव हुँदै २०४६ सालको जनआन्दोलनताका आचार्य जिल्लामा पार्टीको उपसभापति भएर सक्रिय थिए ।
नुवाकोटको प्रजातान्त्रिक आन्दोलनमा आचार्यको योगदानलाई भुल्न नसकिने काँग्रेसका पूर्वसभापति अधिकारीले बताए । प्रजातान्त्रिक आन्दोलनका क्रममा आचार्य पटक पटक कारागारसमेत परेका थिए । विसं २०४२ को सत्याग्रह र २०४६ सालको जनआन्दोलनका क्रममा पनि उनी कारागार परेको पूर्वसभापति अधिकारीले बताए ।
पछिल्लो समय आचार्य बिपी विचार मञ्चका जिल्ला अध्यक्ष र बिपी. विचार मञ्चका केन्द्रीय सदस्य थिए । स्व आचार्यका श्रीमती, दुई छोरा र तीन छोरी छन् । रासस
प्रकाशित: Dec 31, 2017| 18:23 आइतबार, पुस १६, २०७४