काठमाडौं- लामो समयदेखि संस्थापन पक्षको अध्यक्ष नैन सिंह महरसँग असहमती राख्दै आएका पौडेल पक्षका विद्यार्थी नेताहरुले महाधिवेशनको घोषणा गरी नेपाल विद्यार्थी संघको उपाध्यक्ष नविन राईको नेतृत्वमा नेविसंघको विधान माथि छलफल कार्यक्रम शुरुवात गरेको छ।
बिहीबार राजधानीको प्रज्ञा प्रतिष्ठानमा बृहत विद्यार्थी भेलाकाबीच एक औपचारिक कार्यक्रमका साथ विधान अधिवेशनको उद्घाटन भएको हो।
उक्त कार्यक्रममा बोल्दै संयोजक नविन राईले अधिवेशनको विकल्प नरहेको कुरा प्रस्ट्याउँदै अध्यक्ष नैन सिंह महर संगठन चलयामान भएको हेर्न नचाहने व्यक्ति भएको आरोप लगाए। साथै उनले भने, 'अध्यक्षज्यू जिम्मेवारीबाट पन्छिन खोजे पनि म पन्छिन मिल्दैन।'
त्यसैगरी देशभर छरिएर रहेका विद्यार्थीहरुलाई विधानमा गर्नुपर्ने सुधारको लागि सुझावको आह्वान पनि उक्त कार्यक्रम मार्फत गरेका छन्।
उक्त भेलामा पौडेल र सिटौला पक्षका अधिकांश वर्तमान पदाधिकारीहरु प्रकाश राना, कुन्दनराज काफ्ले, राम प्रसाद अधिकारी, डिल्लीराम सुवेदी, शिव रिमाल र पूर्व ने.वि.संघ केन्द्रिय सदस्यहरु दिपक भट्टराई, हिमालदत्त श्रेष्ठ, बलदेव तिमिल्सीनासमेतको उपस्थिति रहेको थियो।
प्रकाशित: Dec 31, 2017| 18:23 आइतबार, पुस १६, २०७४