दार्चुला घटनाको अध्ययन टोली भारतीय बाटो हुँदै मालघाट पुग्यो

धनगढी– तुइन तर्ने क्रममा बेपत्ता भएका जयसिंह धामी घटनाको छानबिन गर्न दार्चुला पुगेको गृह मन्त्रालयको छानबिन टोली स्थलगत अध्ययनका लागि भारतीय बाटो हुँदै गस्कु मालघाट पुगेको छ।

मन्त्रालयका सहसचिव एवं छानबिन समितिका संयोजक जनार्दन गौतम नेतृत्वको टोली आज बिहान भारतीय बाटो हुँदै स्थलगत अध्ययनको लागि गस्कु मालघाट गएको हो। बुधवार दार्चुलाका सञ्चारकर्मी तथा मानवअधिकारकर्मीसँग कुरा गर्दै घटनाको सुक्ष्म ढङ्गले अध्ययन गरेर प्रतिवेदन आउने बताएका गौतमले घटनास्थल पुगेर त्यहाँको वस्तुस्थिति ल्याउने बताए। 

गौतमले भने, ‘समितिले भारतीय एसएसबी र स्थानीयवासीले भारतीय प्रहरी थानामा दिएको उजुरीको सम्बन्धमा पनि जानकारी लिन्छ।’ उनले नेपाल–भारत जोड्ने तुइन राखिएको क्षेत्रको समेत अवलोकन गर्ने बताए।

साउन १५ गते व्यास गाउँपालिका–२ का मालका जयसिंह धामी तुइन तर्ने क्रममा महाकाली नदीमा बेपत्ता भएका थिए। भारतीय सीमा सुरक्षा बल एसएसबीले तुइन तर्ने क्रममा तुइन फुकालिदिएपछि धामी बेपत्ता भएको समाचार आएपछि गृह मन्त्रालयले गौतमको संयोजकत्वमा छानबिन समिति गठन गरेको थियो। 

मंगलबार बेलुका दार्चुला सदरमुकाम खलंगा पुगेको छानबिन टोलीले बुधबार त्यहाँस्थित पत्रकार, मानवअधिकारकर्मी, राजनीतिक दल र व्याँस गाउँपालिकाका जनप्रतिनिधिसँग छलफल गरेको थियो भने घटनाका प्रत्यक्षदर्शीहरुसँग सोधपुछ गरेको थियो। 

सुदूरपश्चिम प्रदेशका प्रहरी नायब महानिरीक्षक पुरुषोत्तम कँडेल, राष्ट्रिय अनुसन्धान विभागका निर्देशक हुतराज थापा, सशस्त्र प्रहरी बलका प्रहरी वरिष्ठ उपरीक्षक सुरेशकुमार श्रेष्ठ र दार्चुलाका सहायक प्रमुख जिल्ला अधिकारी ज्योत्स्ना भट्ट सदस्य रहेको टोलीलाई १० दिनभित्र छानबिन प्रतिवेदन बुझाउन निर्देशन दिइएको छ। छानबिन समितिको प्रतिवेदनअनुसार सरकारले आवश्यक निर्णय लिने जनाएको छ। टोलीलाई १० दिनभित्र छानबिन प्रतिवेदन बुझाउन भनिएको छ।