अब न्यायाधीशले सम्पत्ति लुकाउन नपाउने !

काठमाडौं- अब न्यायाधीशहरूले सम्पत्ति लुकाउन नपाउने भएका छन् । न्यायाधीशको सम्पत्ति विवरण अनिवार्य सार्वजनिक गर्नुपर्ने कानुन निर्माणको तयारीमा सरकार लागेको छ । 

न्यायाधीशहरूको आचरण शुद्ध राख्न यस्तो कानुन ल्याउने तयारी भइरहेको कानुन, न्याय तथा संसदीय मामिला मन्त्री शेरबहादुर तामाङले नेपाल समयलाई बताए । 

हालसम्म न्यायाधीशहरूको सम्पत्ति सार्वजनिक गर्नुपर्ने कानूनी प्रावधान छैन । तर, सबै न्यायाधीशले आफ्नो सम्पत्ति विवरण न्यायपरिषद्मा बुझाउँदै आएका छन् । 

कानुन मन्त्रालयले मस्यौदा तयार गरी मन्त्रिपरिषद्ले निर्णय गरेपछि संसदमा छलफलका लागि पेश हुनेछ । 

मन्त्री तामाङले शपथ लिएलगत्तै पनि न्यायाधीशहरूको सम्पत्ति विवरण सार्वजनिक गर्नुपर्ने कानुन बनाउने घोषणा गरेका थिए । उक्त घोषणाको पक्ष र विपक्षमा विचार सार्वजनिक भएका थिए । मन्त्री तामाङले आफूले न्यायालय सुधारको मुख्य काम यसैबाट शुरु गर्ने घोषणासमेत गरेका छन् ।