भौतिक निर्माणमा जनप्रतिनिधिको प्रतिस्पर्धा : बाबुका नाममा शालिक र प्रवेशद्वार

जनकपुरधाम–आर्थिक वर्ष सकिन केहिदिन मात्र बाँकी छँदा बजेट सकाउन जनप्रतिनिधिहरुलाई अहिले चटारो छ । बजेट सकाउनै गुणस्तरहीन निर्माण कार्यहरु भइरहेको गुनासा आइरहेको अवस्थामा धनुषाको मुखियाट्टी गाउँपालिकाका अध्यक्षले आफ्नो बाबुको शालिक निर्माणलाई प्राथमिकता दिएका छन् ।

गाउँपालिकाका अध्यक्ष मनोज यादवले अन्य महत्वपूर्ण विकास निर्माण कार्यहरुलाई पन्छाउँदै बाबु भोला यादवको शालिक निर्माण कार्यमा जुटेका छन् । 

अध्यक्ष यादवले चर्चित नेता भोला यादवको शालिक निर्माण भन्ने शीर्षक गाउँपालिकाको परिषदबाट पारित गराई शालिक निर्माण कार्य शुरु गरेका छन् । 

तत्कालीन नेकपा एमालेबाट गाउँपालिका अध्यक्षमा निर्वाचित भएका मनोजले स्थानीयवासीहरुको दबाबमा आफ्नो बाबुको शालिक निर्माण गर्न लागेको दाबी गर्छन । 

विगतमा राप्रपाबाट गाविस अध्यक्ष समेत भइसकेका उनका बाबु भोलाको माओवादी द्धन्द्धकालमा गोली हानेर हत्या गरिएको थियो । अध्यक्ष मनोजले आफ्नो बाबुको नाउँमा शालिक निर्माण गर्न २० लाख रुपैया विनियोजन गरेका छन् ।

यता गाउँपालिका अध्यक्षले आफ्नो बाबुको शालिक निर्माण गर्न थालेपछि सोहि गाउँपालिकाका वडा नम्बर २ का अध्यक्ष नरेश यादवले जिवितै रहेका आफ्नो बाबु राजेन्द्र यादवको नाउँले प्रवेशद्धार निर्माण गर्न लगाएका छन् । 

मुखियापट्टी मुसहरनिया गाउँपालिकाको वडा नम्बर २ मा वडा अध्यक्ष नरेशले सुशिल–राजेन्द्र मिलन प्रवेशद्धार निर्माण गर्न लगाएका छन् । प्रवेशद्धार निर्माण गर्न समेत १५/२० लाख रुपैयाँ छुट्यिाइएको स्थानीयहरु बताउँछन् ।

शालिक र प्रवेशद्धार निर्माणमा ४० लाख खर्च हुनेभएपछि गाउँपालिकाको अन्य विकास निर्माणका कार्यहरु पछि पर्ने निश्चित रहेको स्थानीयहरुको भनाई छ । 

बाढी प्रभावित क्षेत्र रहेको मुखियाट्टी मुसहरनिया गाउँपालिकामा शालिक र प्रवेशद्धार भन्दापनि बाढीको जोखिमबाट बँचाउने गरी योजनाहरु आउनु पर्नेमा स्थानीयहरुको जोड छ । तर शालिक र प्रवेशद्धारा निर्माणको नाउँमा रकम खर्चेर आफ्नो आसेपासेलाई पैसा बाँडने कार्य गरिएको स्थानीयहरुको आरोप छ ।