संसद्‍मा जवाफ दिँदै मन्त्री ज्ञवालीले भने, 'पाँच ठाउँमा नाका खोल्ने विषयमा छलफल भएको छ’

काठमाडौं- परराष्ट्र मन्त्री प्रदीप ज्ञवलीले नेपाल र चीनबीचमा टिंकर भञ्ज्याङसहितका पाँच वटा नयाँ नाका सञ्चालन सम्वन्धमा चिनियाँ सरकारसँग छलफल भएको बताएका छन्।

विनियोजन विधेयक, २०७५ अन्र्तगत परराष्ट्र मन्त्रालयको विभिन्न शीर्षकमाथिको छलफलका क्रममा सांसदहरुले उठाएको प्रश्नको जवाफ दिँदै परराष्ट्र मन्त्री ज्ञवलीले भने ‘केरुङ र तातोपानी बाहेक नयाँ पाँच वटा नाका सञ्चालन गर्ने विषयमा छलफल भएको हो।’

मन्त्री ज्ञवलीले नेपाल र भारतबीचको सीमामा देखिएका विवादलाई समाधान गर्न पहल भइरहने बताए। उनले सुस्ता र कालापानी क्षेत्रको सीमा विवाद यथावत रहेको भन्दै पर्साको छपकैयामा नेपाली जनतासँग धनीपूर्जा भएको तर भारतले उपभोग गरिरहेको भन्ने समस्या निरुपण गर्न वाँकी रहेको बताए।
 
उनले भारतको रक्सौल रेलवे क्षेत्रमा नेपाल सरकारको जग्गा रहेको (लिजमा लिएको) तर त्यसको उपभोग गर्न भने नसकेको विषयमा छलफल गरिने बताए।
ज्ञवालीले दैनिक दुई हजार पाँच सय राहदानी वितरण भइरहेको र जिल्ला प्रशासन कार्यालयलबाट वितरण गर्ने व्यवस्था गर्न लागिएको भन्दै वर्तमान सरकार राष्ट्रवादी भएकोले कुनै पनि देशप्रति नढल्किएको बताए।

डेनमार्कले नेपालस्थित दूतावास फिर्ता लिए पनि अवैतानिक महावाणिज्य दूतावास खोल्ने बिषयमा आग्रह गरिएको बताए।