काठमाडौं- सामाजिक सञ्जालको दुरुपयोगका कारण आपराधिक गतिविधि बढेको बताउँदै नियन्त्रणका लागि प्रहरी सक्रिय बनेको छ ।
यस्ता माध्यमको गलत प्रयोग भएको पाइए कडा कानूनी कारवाही गरिने चेतावनी प्रहरीले दिएको छ । फेसबुक, इमो, भाइबरजस्ता माध्यमको दुरुपयोग नगर्न महानगरीय प्रहरी अपराध महाशाखाले सर्वसाधारणलाई अपिल गरेको हो ।
नचिनेको व्यक्तिसँग साथी बन्ने, सामाजिक सञ्जालमा रहेका तस्बिरहरू डाउनलोड गरेर बिगार्ने तथा अश्लील बनाई सामाजिक सञ्जालमा पोस्ट गर्ने काम गैरकाननूनी रहेको महाशाखाले सम्झाएको छ ।
त्यस्ता सामग्रीबाट कसैको प्रतिष्ठामा आँच पुग्न गएमा तथा अश्लील सामग्री सेयर गर्ने व्यक्ति र संस्थाविरुद्ध विद्युतीय कारोबार ऐन, २०६३ अनुसार कारवाही हुने महाशाखाले जनाएको छ । त्यस्तो अपराधमा दुई लाख रुपैयाँसम्म जरिवाना र पाँच वर्षसम्म कैद वा दुवै सजायँ हुने व्यवस्था छ ।
तस्बिर मात्र नभई कुनै व्यक्ति वा संस्थाको प्रतिष्ठामा आँच पुग्ने गरी गाली, गलौज र कमेन्ट गर्दा ऐनको त्यो प्रावधान आकर्षित् हुन्छ ।
यसैबीच, न्युज-२४ टेलिभिजनबाट प्रसारित हुने 'सीधा कुरा' कार्यक्रममाथि परेका उजुरी छानविनको घटनालाई आधार बनाई प्रेस काउन्सिलका पदाधिकारीहरूविरुद्ध सामाजिक सञ्जालमा आपत्तिजनक र अमर्यादित शब्दहरू प्रयोग गर्दै पोस्ट र कमेन्ट गर्ने दुई जना पक्राउ परेका छन् ।
पक्राउ पर्नेहरूमा इलाम-६ तिल्केनीका ५० वर्षीय विनोद गौतम र नवलपरासीको सुनवल-४ का ३६ वर्षीय विष्णु ढकाल छन् । उनीहरूलाई विद्युतीय कारोबार ऐन, २०६३ को दफा ४७ बमोजिम एक लाख रुपैयाँसम्म जरिवाना वा पाँच वर्ष कैद वा दुवै सजायँ हुने महाशाखाले जनाएको छ ।
प्रहरीले सार्वजनिक गरेको सूचना
प्रकाशित: Dec 31, 2017| 18:23 आइतबार, पुस १६, २०७४