नारायणगढ-मुग्लिन सडक : पहिरो हट्यो, जाम खुलेन

काठमाडौं- पहिरोका कारण अवरुद्ध भएको पृथ्वी राजमार्गअर्न्तगत् नारायणगढ-मुग्लिन १२ घण्टापछि खुलेको छ । तर, पहिरो पन्छाउन सफलता मिले पनि बिहानैदेखि लागेको गाडीहरूको लामका कारण मंगलबार रातिसम्म पनि सवारी जाम खुलेको छैन । 

सोमबार बिहान ४ बजे तोपखोलामा गएको पहिरो बेलुका ४ बजे हटाइएको छ । सोमबार बिहान कालीखोला र तीनकिलोबीचमा पर्ने तोपखोलामा गएको पहिरोका कारण नारायणगढ-मुग्लिन सडक अवरुद्ध भएको थियो । जसका कारण पाँच हजारभन्दा बढी यात्रु अलपत्र परेका छन् ।

प्रहरीका अनुसार पहिरोका कारण कुनै मानवीय क्षति भने हुन पाएन। बिहानीको समयमा पहिरो गएको कारण ठूलो क्षति बेहोर्नु नपरेको ट्राफिक प्रहरीले जनाएको छ । पहिरो पन्छाउन एक स्काभेटर र तीन वटा लोडर प्रयोग गरिएको थियो।