पश्चिम तराईमा अत्यधिक गर्मी, जनजीवन प्रभावित

धनगढी- केहिदिन यता लगातार बढ्दै गएको गर्मीका कारण पश्चिम तराईकोे जनजीवन नराम्ररी प्रभावित भएको छ । 

लगातार रुपमा बढ्दै गएको गर्मीमा शनिबार बेलुकी केहि छिन परेको पानीले केहि राहत भए पनि त्यसयता गर्मी झन बढेको छ । सोमबार धनगढीको गर्मी ४२ डिग्री सेल्सियस सम्म पुगेको छ । बढ्दै गएको गर्मीका कारण बालबालिका, वृद्धवृद्धा र मजदुर थप समस्या परेका छन् । 

गर्मी बढेसँगै श्वासप्रश्वासको समस्या, ज्वरो आउने, टाउको दुख्ने, वाकवाकी लाग्नेजस्ता बिरामीको चाप स्वास्थ्य संस्थामा बढेको स्वास्थ्यकर्मीले बताएका छन् । गर्मी बढ्दै जाँदा सर्वसाधारण घर बाहिर निस्कन सकिरहेका छैनन् ।

अत्यधिक गर्मी बढ्दा हैरान बनेका सर्वसाधारण पटक-पटक विद्युत अवरुद्ध हुँदा थप हैरान नबनेका छन्। गर्मी बढ्दै जाँदा कतिपय व्यक्ति गर्मी छल्नकै लागि स्वीमिङ पुलमा नुहाउने तथा चुरेपहाडको बूढीतोला र खानीडाँडासम्म पुग्न थालेका छन् । वर्षा नभएको र गर्मी बढ्दै जाँदा आकाशको पानीको भरमा धान रोपाइँ गर्ने तयारीमा रहेका कृषकले पानीको अभावमा रोपाइँ गर्न सकेका छैनन् । बोरिङको पानी तानेर गरिएको रोपाइँ पानीको अभावमा सुक्न थालेको छ भने खेतबारीमा राखिएको धानको ब्याड पनि सुकेका स्थानीय कृषक धनिराम चौधरीको बताए । यस क्षेत्रमा मनसुन अझैसम्म सक्रिय हुन सकेको छैन । 

भिमदत्त नगरका विद्यालय ४ दिन बन्द

यसैबीच गर्मी अत्यधिक बढेपछि कञ्चनपुरको भीमदत्त नगरपालिका क्षेत्र भित्र रहेका सबै नीजी तथा सामुदायिक विद्यालय भोली (मंगलबार) बाट चार दिनका लागि बन्द गर्ने निर्णय गरिएको छ । 
नगरपालिकाले गर्मीलाई मध्यनजर गर्दै १२ गते देखि १६ गते सम्म विद्यालय बन्द गर्ने निर्णय गरेको नगरपालिकाका उपमेयर शुशिला चन्द सिंहले जानकारी दिईने । गर्मी अत्यधिक बढ्दा स्कुलले बालबालिकाको पठनपाठनमा निकै प्रभाव परिरहको छ ।