विराटनगर- सुनसरीको कोशी गाउँपालिका-८ नङ्खुटोलस्थित पूर्व-पश्चिम राजमार्गमा आज भएको सवारी दुर्घटनामा तीन जनाको मृत्यु भएको छ। दुई जना घाइते भएका छन्।
पूर्वबाट पश्चिमतर्फ जाँदै गरेको बा ३ ख ७२२४ नम्बरको माइक्राे बसले बिहान ८ बजे विपरीत दिशाबाट आउँदै गरेको स ६ प ४६६१ नम्बरको मोटरसाइकल र को१च ९३६८ नम्बरको पिकअप गाडीलाई ठक्कर दिएको थियो।
दुर्घटनामा मोटरसाइकल चालक सप्तरीको डाक्नेश्वरी–५ का २८ वर्षीय उदय साह, मोटरसाइकलको पछाडि सवार मोरङको विराटनगर–९ का ४५ वर्षीय रामप्रसाद साह र पिकअप चालक विराटनगर–७ का ४० वर्षीय अक्षयकुमार गुप्ताको जिल्ला अस्पताल इनरुवामा उपचारको क्रममा मृत्यु भएको प्रहरीले जनाएको छ।
दुर्घटनामा गाडी चालक नुवाकोटको विदुर नगरपालिका–१३ का ३५ वर्षीय विवश तामाङ र सह–चालक विदुर–११ का २५ वर्षीय नारायण बस्यालको विराट अस्पतालमा उपचार भइरहेको प्रहरीले जनाएको छ।