काठमाडौं- नेपाली कांग्रेसका नेताहरू डा रामशरण महत र अर्जुननरसिंह केसीले आगामी महाधिवेशनमा सभापतिको उम्मेदवार हुने बारे समान धारणा राखेका छन्। वरिष्ठ नेता रामचन्द्र पौडेलले बोलाएको बसुन्धरा भेलाका क्रममा नुवाकोटका दुवै नेताहरूले समान धारणा राखेका हुन्।
उनीहरूले सभापतिमा आफूहरू पनि उम्मेदवार भएका बताएका थिए। तर यदि पौडेल पक्षभित्र सहमतिमा एक जना मात्र उम्मेदवार तयार गरी अघि बढ्न सकिने अवस्था आए आफूहरू पछि हट्न सक्ने बताएको भेलामा सहभागी एक नेताले बताए।
'कांग्रेसमा विभिन्न जिम्मेवारीमा काम गरिसकेकाले अब मेरो चुनाव लड्ने पद भनेको सभापति नै हो। यसका लागि तयारी पनि गरेको छु,' डा महतलाई उद्धृत गर्दै भेलामा सहभागी ती नेताले भने, 'तर सहमति हुन्छ र एक जना मात्र उम्मेदवार खडा गर्न सकिन्छ भने सहमतिमा आउन सकिन्छ।'
नेता केसीले पनि उनको जस्तै धारणा पौडेल भेलामा राखेका थिए। 'सहमतिमा एक जना उम्मेद्वार हुने हो भने छाड्न सकिन्छ। तर एकभन्दा बढी उम्मेद्वार हुने स्थिति आए पछि हट्ने भन्ने कुरा हुँदैन,' केसीलाई उद्धृत गर्दै ती नेताले भने।
गत प्रतिनिधि सभा निर्वाचनमा दुवै जना नुवाकोटबाट उम्मेदवार थिए। तर दुवै नेता पराजित भएका थिए।