विराटनगर- विराटनगरबाट लागुऔषधसहित सशस्त्र प्रहरीले एक युवालाई पक्राउ गरेको छ। पक्राउ परेका युवा भारतीय नागरिक हुन्।
सशस्त्र प्रहरी बल बिओपी दरैयाबाट खटिएको टोलीले भारतको अररिया भवानीपुर घर भई विराटनगर महानगरपालिका-१२ बखरीमा डेरा गरेर बस्ने १८ वर्षीय करन कामतलाई पक्राउ गरेको हो।
सशस्त्र प्रहरी बल मोरङका प्रमुख एसपी तीर्थ पौडेलले भारतको जोगवनीबाट लागुऔषध लिएर आउँदै गर्दा विराटनगर-१६ दरैयाबाट बिहीबार पक्राउ परेका कामतलाई आवश्यक कारबाहीका लागि इलाका प्रहरी कार्यालय रानीको जिम्मा लगाइएको बताए।
उनका अनुसार कामतले पाइन्टको गोजीभित्र खुकुरी चुरोटको बट्टामा लुकाएर ल्याएको अवस्थामा लागुऔषध बरामद भएको हो। उनको साथबाट ब्राउन सुगर (खैरो हेरोइन) ३ ग्राम ४ सय मिलिग्राम र नाइट्राभेट तथा स्पास्मोप्रोक्सिभनसमेतका लागुऔषध र नेपाली एक हजार रुपैयाँट बरामद भएको एसपी पौडेलको भनाइ छ।