जेठ ३० यता बाढीपहिरोमा २० जनाको मृत्यु, २१ बेपत्ता

काठमाडौं– वर्षाका कारण देशका विभिन्न स्थानमा आएको बाढीपहिरो र डुबानमा परी गत जेठ ३० गतेदेखि आज सोमबार दिउँसोसम्म २० जनाको मृत्यु भएको प्रहरीले जनाएको छ। 

मृत्यु हुनेमा १३ जना पुरुष, ४ जना महिला, २ जना बालक र १ जना बालिका छन्। सिन्धुपाल्चोकमा ५ जना, डोटीमा ३ जना, सप्तरी, काभ्रे, गोरखा, कास्की, अर्घाखाँची, पाल्पा, प्युठान, जुम्ला, कालिकोट, बझाङ, पाँचथर र बाजुरामा १–१ जनाको मृत्यु भएको छ।

बाढी तथा पहिरोमा परी ८ सय ६ जनाको उद्धार गरिएको प्रहरीले जनाएको छ। तीमध्ये मनाङमा ६५६ जना, सिन्धुपाल्चोकमा १२३ जना, सल्यान र लमजुङमा ८–८ जना, दाङ र गोरखामा ४–४ जना र कञ्चनपुरमा ३ जना छन्। उनीहरुलाई विभिन्न अस्पतालमा लगिएको छ। 

बाढीपहिरो र डुबानमा परी २० जना घाइते भएका छन्। तीमध्ये १३ जना पुरुष, ४ जना महिला, १ जना बालक र २ जना बालिका छन्। सिन्धुपाल्चोकमा ५ जना, म्याग्दी र डोटीमा ३–३ जना, जुम्ला र कास्कीमा २–२ जना, स्याङजा, चितवन, सल्यान, पाँचथर र दार्चुलामा १–१ जना घाइते भएका छन्।

बाढीपहिरोमा परी २१ जना अझै बेपत्ता छन्। बेपत्ता हुनेमा १४ जना पुरुष, ५ जना महिला र २ जना बालक छन्। बेपत्ता हुने सिन्धुपाल्चोकका २० जना र बाजुराका १ जना हुन्।

पहिरो तथा बाढीका कारण बन्द भएका विभिन्न स्थानका सडक सुचारु गराइएको  प्रहरीले जनाएको छ। जुम्ला, कास्की, बैतडी लगायतका स्थानहरुमा सोमबार पहिरो गई अवरोध भएको सडक हटाउने कार्य जारी छ।

बाढीका कारण २१० वटा घर डुबानमा परेका छन्। २०६ वटा घर, १२ वटा गोठ, १८ वटा पुल, ३ वटा विद्यालय र ८ वटा सरकारी कार्यालयमा क्षति पुगेको छ। ७ सय ४८ वटा घरका ३ हजार २ सय ५८ जना मानिस विस्थापित भएका छन् भने ६ सय ३० वटा पशु चौपायको मृत्यु भएको छ।