काठमाडौं- सोमबार देशका अधिकांश स्थानमा मौसम सक्रिय रहेको छ। मनसुनी वायुको प्रभावका कारण हाल देशभर सामान्यदेखि पूर्ण बदली रही बागमती, गण्डकी, लुम्बिनी प्रदेश, कर्णाली र सुदूरपश्चिम प्रदेशका केही र बाँकी प्रदेशका एक-दुई स्थानमा वर्षा भइरहेको छ।
सोमबार दिनभर देशभर सामान्यदेखि पूर्ण बदली रहनेछ। देशका धेरै स्थानमा मेघगर्जन/चट्टयाङ्गसहित हल्कादेखि मध्यम वर्षाको सम्भावना रहेको छ। प्रदेश नम्बर १, प्रदेश नम्बर २, गण्डकी प्रदेश तथा लुम्बिनी प्रदेशका एक-दुई स्थानमा भारी वर्षाको समेत सम्भावना छ।
प्रदेश १, प्रदेश २, गण्डकी प्रदेश तथा लुम्बिनी प्रदेशका एक-दुई स्थानमा भारी वर्षा हुने भएकाले आवश्यक सतर्कता अपनाउन मौसम पूर्वानुमान महाशाखाको आग्रह छ।
बाढी पूर्वानुमान महाशाखाले पनि लमजुङ, कास्की, पर्वत, बागलुङ, म्याग्दी, पाल्पा, कपिलबस्तु, अर्घाखाँची, गुल्मी, प्युठान, दाङ, रुकुम, कञ्चनपुर, कैलाली, डडेलधुरा, डोटी र अछाम आसपास भए बहने साना ठूला नदीमा आकस्मिक बहाव बढ्न सक्ने भएकाले तटीय क्षेत्रका बासिन्दालाई सतर्कता अपनाउन आग्रह गरेको छ।