गलकोट- बागलुङ जिल्लाका काठेखोला गउँपालिका–७ गिरी थापा २०५३ सालमा शिक्षक पेसा छाडेर वैदेशिक रोजगारको लागि कतार गए । कतारमा १५ वर्ष बसेर नेपाल फर्किएपछि आफ्नै गाउँठाउँमा व्यावसाय गर्ने सोच बनाए ।
दाजुको सोचलाई सहयोग गर्न भाइ मीन थापा तयार भए । मीन पनि त्यतिन्जेल शिक्षण पेशामै रमाइरहेका थिए । उनी रेश नुन्थला माविमा अध्यापन गराउँदै व्यवसायलाई पनि अघि बढाउने दाइको उद्देश्यमा साथ दिन तयार भए ।
दश वर्षअघि २०६८ सालमा दुई भाइ मिलेर फर्निचर उद्योग सञ्चालन गरे । फर्निचर उद्योगबाट सुरु भएको व्यावसायलाई दाजुभाइले विस्तार गरिरहेका छन् । हाल थापा वन्धु बाख्रा पालनसँगै लोकल कुखुरा, बङ्गुर र बँदेलपालनलाई अघि बढाइरहेका छन् भने व्यावसायिक तरकारी खेतीमा पनि संलग्न रहेका छन् । उनीहरुको कुटानी–पिसानी मिलसमेत छ ।
'सुरुमा हामी दुवै शिक्षक थियौं । दाइ विदेश जानुभयो । मैले शिक्षण पेसा गर्दै आए । उहाँ गाउँ फर्केर आएपछि आफ्नै व्यवसाय गरौं भन्नुभो र सुरु गरियो । दाइले दिनभर व्यवसायलाई समय दिनुहुन्छ । म बिहान–बेलुका समय दिन्छु,' भाइ मीनले भने, 'बँदेलका र बङ्गुरका पाठापाठी बिक्रीलाई बढी जोड दिएका छौं । बाख्रा र कुखुरामा भर्खर लगानी गरेका हौं ।'
अहिले तीनवटा माउ बँदेल र ४० वटा बङ्गुर छन् । अहिले ३० वटा बङ्गुरबाट पाठापाठी बिक्रीका लागि तयारी अवस्थामा छ । बङ्गुरका पाठापाठी मात्रै बेचेर वार्षिक तीनदेखि चार लाख आम्दानी हुने गरेको गिरीले बताए ।
'फर्निचर उद्योगबाट निस्केका काठ सदुपयोग गर्न बङ्गुरको खोर निर्माण गरेका थियौँ तर अहिले बँदेल र बङ्गुर व्यावसायिक रूपमा पालेका छौं; उनले भने, 'विदेशमा भन्दा स्वदेशमा राम्रो कमाइ हुँदो रहेछ । अहिले थोरै भए पनि वार्षिक १०/१२ लाखको कारोबार हुँदै आएको छ ।'
दुई भाइले पीपलडाँडा ताजा तरकारी तथा पशुपालन फार्म दर्ता गरेर कुखुरा, बाख्रा र तरकारीसमेत उत्पादन गर्दै आएका छन् । अहिले दर्जनभन्दा बढी बाख्रा मासुका लागि बागलुङका बजारमा बिक्री हुने गरेको छ । फार्ममा आठ बाख्रा, सय लोकल कुखुरा छन् भने दुई रोपनी बारीमा सिमी फलेको छ ।
मौसमी तरकारी मात्रै उत्पादन गर्दै आएका दाजुभाइले बेमौसमी तरकारी उत्पादनलाई समेत जोड दिने योजना बनाएका छन् । उत्पादन गर्न सके खसी, बोका, बँदेल, बङ्गुर, कुखुरा र फर्निचरका सामग्रीको बजारीकरणको कुनै समस्या नभएको उनीहरुको भनाइ छ ।
कुटानी–पिसानी, बाख्रापालन तथा कुखुरापालनमा परिवारका अन्य सदस्यहरुले समेत सहयोग गर्दै आएको दाजुभाइको भनाइ छ । त्यसबाहेक फर्निचरमा दुईजना युवाले रोजगारीसमेत पाएका छन् ।
बङ्गुरको मासुको रु ४०० प्रतिकेजी र पाठापाठीलाई रु पाँच हजारमा बिक्री गर्दै आएका उहाँहरुले २०७२ सालमा पोखराबाट बँदेल प्रजातिको बङ्गुर लिएर पाल्दै आएका छन् ।
बङ्गुरको भन्दा बँदेलको मासु स्वादिष्ट भएकाले राम्रै मूल्यमा बिक्री हुने गरेको गरेको गिरीको भनाइ छ । बँदेलको मासु प्रतिकेजी रु ६०० मा बिक्री गर्दै आएको र पाठापाठीलाई रु छ हजारमा बिक्री हुँदै आएको छ ।
दुई भाइले गाउँमै व्यावसायिक फर्निचर उद्योग, पशुपालन तथा तरकारी उत्पादनमा लाग्नु उदाहरणीय कार्य भएको काठेखोला–७ रेशका वडाध्यक्ष प्रेम लामिछानेले बताउँछन् ।