काठमाडौं– एमाले नेता वामदेव गौतमले पार्टी एकतामा अध्यक्ष केपी शर्मा ओलीको प्रयत्न इमानदार नदेखिएको प्रतिक्रिया दिएका छन्। पार्टी एकताका लागि ओलीले गरेको ६ बुँदे प्रस्तावका सम्बन्धमा पार्टी एकता राष्ट्रिय अभियानको कार्यसम्पादन समितिका सदस्यहरुबीच छलफलपछि यस्तो निष्कर्ष निकालेको गौतमले विज्ञप्तिमार्फत जनाएका हुन्।
गौतमले भनेका छन्, ‘अध्यक्षले वक्तव्यमा आफ्नै प्रशंशालगायत कुटिल चातुर्य र जालझेलको अनुमान गर्न सकिने भाषाशैलीको प्रयोगका बाबजुद बुँदा न. १ मा ‘नेकपा (एमाले) लाई २०७५ जेठ ३ गते पूर्वको अवस्थाबाट अगाडि बढाइनेछ’ भनेको विषयलाई बैठकले सकारात्मक रुपमा ग्रहण गरेको छ। तर सोही बुँदामा एकताको पक्षमा उभिएका कमरेडहरुलाई आधार मानेर केन्द्रीय कमिटी र स्थायी कमिटीका संरचना गतिशील हुने भन्ने विषय एमालेभित्रको समस्यामा ल्याउनु अनुचित छ। त्यसैगरी जनवर्गीय संगठनहरुका संरचनाका सम्बन्धमा मूलभूत रुपमा भन्नुको अर्थ २०७५ जेठ ३ पूर्वको जस्ताको तस्तै अवस्थालाई अस्वीकार पनि गर्न सकिन्छ भन्ने हो जसलाई इमानदार एकताको प्रयत्न मान्न सकिन्न।'
गौतमले २०७५ जेठ २ गते कायम रहेको एमालेको दुई वरिष्ठ नेता, चार उपाध्यक्ष, एक महासचिव, दुई उपमहासचिव र पाँच सचिवसहितको स्थायी कमिटी बैठक बोलाएर पार्टीभित्र उत्पन्न विषयमा छलफल गरी सही मार्गदर्शन गर्न जोड दिएका छन्।