काठमाडौं– स्वीस टेनिस खेलाडी रोजर फेडेररले जारी फ्रेन्च ओपनबाट आफ्नो नाम फिर्ता लिन सक्ने बताएका छन्।
यदि खेलका क्रममा घुँडामा थप चोटको सम्भावना देखिए फेडेररले प्रतियोगिताबाट नाम फिर्ता लिनसक्ने बताएका हुन्।
पछिल्लो आइतबारको खेलमा फेडेररले डोमिनिक कोइपफरविरुद्ध साढे तीन घण्टाको खेलमा जित निकालेका थिए। जुन उनको घुँडाको दोहोरो शल्यक्रियापछिको छैटौं खेलसमेत थियो।
अब ३९ वर्षे फेडेररले सोमबार अन्तिम १६ को खेलमा म्याथ्यु बेरेट्टिनीसँग खेल्नुपर्ने छ। तर उनले खेलअघि नै भनेका छन्, ‘आरामका लागि उपयुक्त समय हेरेर म खेल अघिसम्ममा खेल्ने वा नखेल्नेबारे निर्णय लिनेछु।’
फेडेरर पुरुषतर्फ २० पटकका ग्राण्डस्लाम विजेता पनि हुन्। उनले गत आइतबारको खेलमा जर्मनीका कोइपफरविरुद्ध जित निकालेका थिए।
विश्व टेनिस वरियताको आठौं स्थानमा रहेका फेडेररले अहिले गत वर्षको जनवरीयता तेस्रो प्रतियोगिता खेल्दैछन्। र, उनले अब विम्बल्डन प्रतियोगिताको लागि फिट रहन रेस्ट गर्नुपर्ने जनाएका छन्। विम्बल्डन जुन अन्तिममा सुरु हुँदैछ।
उनले सोमबार प्रतिस्पर्धा गर्ने बेरेट्टिनि रोनाल्ड ग्यारोजमा पहिलो पटक अन्तिम १६ मा पुगेका हुन्। फ्रेन्च ओपनका यसअघि जापानी स्टार नाओमी ओसाकाले पनि आफ्नो नाम फिर्ता लिएकी थिइन्।