कानुन व्यवसायीलाई प्रधानन्यायाधीशको चेतावनी : निवेदन फिर्ता लिनुहुन्छ कि अदालतको अवहेलनामा मुद्दा चलाउनुपर्ने हो ?

काठमाडौं- अधिवक्ता राजाराम घिमिरेसहितका कानुन व्यवसायीले ११ जना न्यायाधीश इजलासमा समावेश राख्न नहुने भन्दै निवेदन पेस गर्ने तयारी गरेपछि प्रधानन्यायाधीश चोलेन्द्रशमशेर राणाले कडा चेतावनी दिएका छन्।

इजलासमा सुनुवाइ सुरु भएलगत्तै उनीहरूको निवेदनका विषयमा छलफल हुँदा प्रधानन्यायाधीश राणाले इजलासको मर्यादा कायम राख्न आग्रह गरेका छन्। 

‘न्यायाधीशप्रति विश्वास राख्नु पनि तपाईंहरूको कर्तव्य हो। निवेदन दिनुभएको छ। विषयवस्तु गम्भीर छ। कुनै पनि न्यायाधीशले मुद्दा हेर्न नसक्ने स्थिति आयो भने अदालतको अवहेलनामा मुद्दा चलाउनुपर्ने अवस्था आउन सक्छ,’ उनले भने, ‘नभए इजलासले कठिन रुपमा अघि बढ्नुपर्ने अवस्था आउन सक्छ। आफैं फिर्ता लिनुहुन्छ कि ? निवेदन दर्ता भएपछि कठिन अवस्था आउन सक्छ।’ 

परिणाम के हुन्छ तपाईं तयार हुनुहुन्छ भन्दै कानुन व्यवसायीहरूलाई सोधेपछि उनीहरूले तयार छु भनेका थिए।