काठमाडौं- नागार्जुन नगरपालिका-३ स्थित इचंगु नारायण मन्दिरमा रहेको राधाकृष्णको मूर्ति चोरी भएको छ। मूर्ति मंगलबार राति चोरी भएको हो।
नागार्जुन-३ का वडाध्यक्ष प्रेमलाल श्रेष्ठका अनुसार दुई सानो र दुई ठूलो गरी चार मूर्ति चोरी भएका छन्। 'भक्तजनले चढाएका पितका मूर्ति गए राति चोरी भएका हुन्। चोरले चाँदी मूर्ति नलगी सुनको मूर्ति ठानेर पित्तलका मूर्ति मात्रै चोरेको छ', उनले भने।
महानगरीय प्रहरी वृत्त स्वयंभूका डीएसपी मिलन केसीले घटना बारे अनुसन्धान थालिएको बताए। मन्दिरमा सानो झ्याल रहेको बताउँदै उनले चोरले झ्यालको ग्रिल उप्काएर मूर्ति चोरी गरेको डीएसपी केसीले बताए।
मन्दिर वरिपरि रहेका सीसीटीभीले खासै काम नगरेकाले चोर पहिचानमा समस्या भएको प्रहरीको भनाइ छ।