पाकिस्तान सुपर लिग जुन ९ बाट सुरु गर्ने तयारी

काठमाडौं- कोभिड-१९ को महामारीको कारण बीचमै रोकिएको छैटौं सिजनको पाकिस्तान सुपर लिग (पीएसएल) टी-२० क्रिकेट आउँदो जुन ९ बाट यूएईमा सुरु गर्ने तयारी थालिएको छ। जुन ९ बाट प्रतियोगिता सुरु गरेर २४ जुनमा फाइनल खेल अबुधाबीमा गर्ने पाकिस्तान क्रिकेट लिगको योजना छ।

प्रतियोगिताका ६ दिन दुई खेल हुनेछन् जसमा सुरुको खेल स्थानीय समय अनुसार ५ बजे र दोस्रो खेल ८ बजे हुनेछ। विभिन्न देशबाट खेल्ने खेलाडीले अब यूएईमा १० दिन अनिवार्य क्वारेन्टिन बसेर मात्र प्रतियोगिता खेल्न पाउने छन्।

यता पाकिस्तानबाट प्रतियोगिता खेल्नका लागि यूएई पुगेका खेलाडी र अफिसियलको क्वारेन्टिन अवधि जुन २ तारिकमा नै सकिएको छ।

यसअघि प्रतियोगिता जुन ५ तारिकबाट सुरु गर्ने भनिए पनि अनुमति स्थानिय सरकारले अनुमति समयमै नआएपछि ढिलाई भएको हो। यूएईको सरकारले प्रतियोगिताका लागि अनुमति दिन ढिलाई गरेपछि पछिल्ला दुई हप्ताबाट प्रतियोगिता हुने वा नहुनेबारे शंकाहरु पैदा भएका थिए।