काठमाडौं- पुँजीबजार सूचक नेप्सेले आइतबार दुई नयाँ रेकर्ड बनाएको छ। आइतबार कारोबार रकम र नेप्से सूचकले नयाँ रेकर्ड कायम गरेको हो।
आइतबार १७ अर्ब २ करोडभन्दा बढी रकमको कारोबार भएको छ। यो हालसम्मकै उच्च कारोबार रकम हो। यसअघि गत बिहीबार १४ अर्ब ७६ करोड रुपैयाँभन्दा बढीको कारोबार भएको थियो।
आइतबार नेप्से परिसूचकले पनि नयाँ रेकर्ड बनाएको छ। १२.५४ अंकले बढेर २८२७.९३ अंकमा पुगेको नेप्सले यसअघि गत सोमबारको रेकर्ड तोडेको हो।सोमबार नेप्से २८२३.४० बिन्दुमा पुगेर बन्द भएको थियो।
शनिबार आगामी आर्थिक वर्ष २०७८/७९ को बजेट आएको भोलिपल्ट आइतबार नेप्सेले नयाँ रेकर्ड बनाएको हो। यसले बजेटको सकारात्मक प्रभाव सेयर बजारमा परेको विश्लेषण गरिएको छ।