काठमाडौं - नेपाल सुपर लिग (एनएसएल)को अनुशासन समितिले विराटनगरका प्रशिक्षक यान लसहित विभिन्न अफिसियललाई कारबाही गरेको छ।
‘ललितपुर र विराटनगरबीचको खेलको फुटेज हेरेर र म्याच कमिसनलको रिपोर्टबाट एन्फा टेक्निकल कमिटीले विराटनगर सिटीलाई कारबाही गरेको छ,’ एनएसएलले जारी गरेको विज्ञप्तिमा भनिएको छ।
यससँगै विराटनगर सिटीले एक लाख रूपैयाँ जरिबाना तिनुपर्ने भएको छ। एनएसएलले प्रशिक्षक र अफिसियलले खेलाडीलाई मैदानमा छोड्न प्रेरित गरेको भन्दै एनएसएलले जरिबाना गराएको हो।
विराटनगरले ललितपुरविरुद्धको खेलमा खेलको ७२औं मिनेटबाट ७९औं मिनेटसम्म खेलाडीलाई मैदानबाहिर बोलाएर खेल अवरुद्ध गराएको थियो। यद्यपि स्पेनिस खेलाडी पेड्रो मान्जी र सन्तोष तामाङ भने मैदानमा थिए।
त्यस्तै विराटनगरका प्रशिक्षकलाई एनएसएलले ५० हजार रूपैयाँ जरिबाना तिराएको छ। उनलाई एक सिजनका लागि प्रतिबन्ध गरेको छ।
खेलाडी मैदानबाहिर बोलाउन मुख्य भूमिका खेलेको र टचलाइन पार गरेका कारण उनी प्रतिबन्धमा परेका हुन्। उनले खेलका अफिसियलमाथि लगातार गाली गरेका थिए। मोर्डन फुटबलमा यो कुरा मान्य नहुने एनएसएलको विज्ञप्तिमा लेखिएको छ।
त्यस्तै विराटनगरका सोनम घले, निशान श्रेष्ठ, मिलन गुरुङलगायतका अफिसियललाई पनि तीन खेलमा प्रतिबन्ध लगाइएको छ।