काठमाडौं – स्वास्थ्य तथा जनसंख्या मन्त्रालयले अस्पतालमा आइपुगेका अक्सिजन सिलिन्डर ‘होल्ड’ नगर्न अनुरोध गरेको छ। मन्त्रालयले एक सूचना जारी गर्दै सिलिण्डर होल्ड नगर्न र एक उद्योगका सिलिन्डर अर्कोसँग साटफेर नगर्न अस्पतालहरूलाई निर्देशन दिइएको छ।
पछिल्लो समय अस्पतालमा अक्सिजन आपूर्ति सहज हुँदै गएको बेला एकअर्कामा साटफेर हुने गरेकाले समयमा अक्सिजन भर्न नपाइने समस्या देखिएको मन्त्रालयले जनाएको छ।
एउटा उद्योगका अक्सिजन सिलिण्डरहरू अन्यत्र जाने क्रम पनि अत्यधिक बढिरहेककाले यसले आगामी दिनमा समस्या निम्त्याउने मन्त्रालयले जनाएको हो।
त्यस्तै, मन्त्रालयले सर्वसाधारणका घरमा प्राविधिक ज्ञानविना अक्सिजन सिलिन्डर नराख्न पनि आग्रह गरेको छ। अनावश्यक रुपमा घरमा सिलिन्डर राख्दा अस्पतालमा उपचाररत बिरामीलाई अक्सिजन अभाव हुन सक्ने भन्दै मन्त्रालयले यो समयमा संवेदनशील हुन सबैमा आग्रह गरेको छ।