काठमाडौं - नेपाली कांग्रेसका नेता डा. प्रकाशशरण महतले महामारीमा टेकेर राजनीतिक गर्ने र जनता तर्साउने काम भएको बताएका छन्। कांग्रेस पदाधिकारी तथा पूर्वपदाधिकारी बैठकपछि उनले जनता तर्साएर ओली सरकार सत्ता टिकाउन केन्द्रित भएको आरोप लगाए।
‘अक्सिजन, बेड र परीक्षणमा ध्यानै छैन,’ उनले भने, ‘आतंक फैलाएर राजनीतिक स्वार्थ सिद्ध गर्ने काम भइरहेको छ।’
उनले बैठकमा राजनीतिक विषय र कोभिडबारे छलफल भएको जानकारी दिए। महाधिवेशनको विषयमा भने छुट्टै बैठकमा यसबारे छलफल हुने उनको भनाइ छ।
‘सरकार महामारी नियन्त्रण र उपचारमा केन्द्रित होस्, लकडाउनका कारण खान नपाउने तर्फ ध्यान देओस्,’ उनले भने, ‘प्रधानमन्त्री र प्रधानन्यायाधीशको भेट भएको भन्ने सुनेका छौं, सञ्चार जगत्बाट दबाब दिनुपर्छ।’
संक्रमणका बेला सडकमा उत्रने अवस्था नभएको भन्दै उनले भने, ‘सञ्चारमाध्यम र सामाजिक सञ्जालमा नागरिक समाज र पार्टी संयन्त्रलाई प्रधानमन्त्री र राष्ट्रपतिको कदमविरुद्ध परिचालन गरिने छ।’