मोरङमा जेठ १७ गतेसम्म लम्बियो निषेध आदेश

विराटनगर- कोरोना संक्रमण न्यूनीकरणका लागि भन्दै मोरङमा निषेध आदेशको अवधि बढाइएको छ। जिल्ला कोभिड संकट व्यवस्थापन केन्द्र (डिसीसीएमसी)को सोमबार बसेको बैठकले जेठ १७ गतेसम्म निषेध आदेश थप गरिएको प्रमुख जिल्ला अधिकारी कोशहरि निरौलाले बताए। मंगलबार मध्यरातिदेखि सकिने भएपछि थप ६ दिन निषेधाज्ञा लम्ब्याउने निर्णय गरिएको उनले बताए।

स्थानीय प्रशासन ऐन २०२८ को दफा ६ को उपदफा ३, संक्रामक रोग ऐन २०२० को दफा २ र कोभिड–१९ संकट व्यवस्थापन अध्यादेश २०७८ बमोजिम जेठ १७ गतेसम्म निषेध आदेश जारी राख्ने निर्णय गरेको प्रजिअ निरौलाले बताए। उनले सुनसरी, मोरङ र झापाको निषेध आदेशमा एकरुपता कायम गर्ने निर्णय समेत गरिएको जानकारी दिए। 

मोरङमा पहिलोपटक वैशाख १८ गते रातीको १२ बजेदेखि लागु हुनेगरी ७ दिने निषेध आदेश जारी गरिएको थियो। कोरोना संक्रमण नियन्त्रणका लागि झन्डै एक महिनादेखि मोरङमा निषेधाज्ञा लगाएपनि प्रभावकारी हुन नसकेको भन्दै जनस्तरबाट आलोचना हुँदै आएको छ।