काठमाडौं– प्रतिनिधिसभा पुनःस्थापनासहित विभिन्न चारवटा माग गर्दै विपक्षी गठबन्धनका सांसदहरुले दिएको रिट भोलि मंगलबारमात्रै दर्ता हुने भएको छ।
यद्यपि सर्वोच्च अदालत प्रशासनका अनुसार ती रुजु भएर दर्ता प्रक्रियामा भने गइसकेका छन्। सांसदहरुको संख्या धेरै भएकाले आज सबै रुजु गर्न नभ्याइएको अदालतले जनाएको छ। केही सांसदहरुको हस्ताक्षर सनाखत गर्नुपर्ने काम भने बाँकी रहेकाले पनि आज दर्ता हुन नसकेको हो।
सर्वोच्चका रिट महाशाखा प्रमुख बाबुराम दाहालले मंगलबार दर्ता भएपछि पेशीको टुंगो लाग्ने बताए। ‘दर्ता प्रक्रियामा गइसकेको छ। भोलि कम्प्युटर इन्ट्री गरेर दर्ता गर्ने काम हुन्छ,’उनले भने।
सर्वोच्च अदालतमा दलका सांसद र कानुन व्यवसायीका २४ वटा र प्रधानमन्त्रीसँग सम्बन्धित ४ वटा रिट निवेदन पेश भएका छन्। यी रिटमा २४ वटा प्रतिनिधिसभा पुनःस्थापना लगायतका मागहरु राखेर पेश भएका रिटहरु हुन् भने ४ वटा रिट समयमा नै निर्वाचनको माग राखिएका रिट हुन्।
प्रतिनिधिसभा पुनःस्थापनाका लागि १५ वटा सामान्य इजलास र ९ संवैधानिक इजलासतर्फका रिट छन्। १४६ जना सांसदमध्ये १३९ जना आफैं उपस्थित भएका थिए भने ७ जनाले प्रतिनिधि पठाएका थिए।
विपक्षी गठबन्धनका सांसदहरुले रिटमा जेठ ७ गते राष्ट्रपति विद्यादेवी भण्डारीसामु पेश गरिएको हस्ताक्षरको आधारमा देउवालाई प्रधानमन्त्री नियुक्त गर्नुपर्ने माग गरेका छन्। मन्त्रिपरिषदको सिफारिसमा राष्ट्रपतिले जेठ ८ गते प्रतिनिधिसभा विघटन गरेकी थिइन्।