वैदेशिक रोजगार बोर्डले १९ सय ३७ जनालाई छात्रवृत्ति दिने

काठमाडौं– वैदेशिक रोजगार बोर्डले वैदेशिक रोजगारीको सिलसिलामा मृत्यु भएका, अंगभंग, अशक्त र बेपत्ता भएका श्रमिकका छोराछोरीलाई शैक्षिक सहायता प्रदान गर्ने भएको छ। 

बोर्डका अनुसार श्रम स्वीकृति लिएर वैदेशिक रोजगारीमा गएका श्रमिकहरुको करार अवधिभित्रमा मुत्यु भएमा बोर्डबाट आर्थिक सहायता लिएका कामदारका बालबच्चाहरुलाई छात्रवृत्ति दिइनेछ।

मृतकका २ अथवा ३ बच्चालाई सरकारी वा निजी जुनसुकै स्कुलमा पढे पनि नर्सरीदेखि ८ कक्षासम्म वार्षिक ८ हजार रुपैयाँ र ९ देखि १२ कक्षासम्म वार्षिक १२ हजार रुपैयाँ छात्रवृत्ति दिँदै आएको छ। बोर्डले यसै शैक्षिक सत्र २०७८ मा ५२ जिल्लाका १९ सय ३७ जनालाई छात्रवृत्ति प्रदान गर्ने भएको छ।

अघिल्लो वर्ष निकालेको सूचनामा ७४ जिल्लाबाट २६ सय वटा निवेदन प्राप्त भएकोमा अहिलेसम्म ५२ जिल्लाका १९ सय ३७ जना छात्रवृत्ति पाउन योग्य भएको बोर्डका कार्यकारी निर्देशक राजन प्रसाद श्रेष्ठले बताए। श्रेष्ठका अनुसार १९ सय ३७ जनालाई छात्रवृत्ति दिन एक करोड ५८ लाख २ हजार रुपैयाँ लाग्ने र त्यो रकम सम्बन्धित जिल्ला शिक्षा कार्यालयलाई पठाउने तयारी भइरहेको छ।