महोत्तरीमा जेठ २० गतेसम्मका लागि निषेध आदेश बढाइयो 

जनकपुरधाम– महोत्तरीमा जारी निषेध आदेश जेठ २० गतेसम्मका लागि बढाइएको छ। आइतबार जिल्ला कोभिड व्यवस्थापन समिति महोत्तरीको बसेको बैठकले जेठ २० गते सम्मका लागि निषेध आदेश बढाउने निर्णय गरिएको प्रमुख जिल्ला अधिकारी तिर्थराज भट्टराईले जानकारी दिएका छन्।  

प्रजिअ भट्टराईले स्थानीय प्रशासन ऐन २०२८ को दफा ६ को उपदफा ३ र संक्रामक रोग ऐन २०२० को दफा २ बमोजिम सोमबार राति १२ बजेदेखि जिल्लाभर निषेध आदेश लगाइएको बताए। महोत्तरीमा वैशाख २२ गतेदेखि निषेधाज्ञा लगाइएको छ।

निषेध आदेशको अवधिमा निजी तथा सार्वजनिक सवारीसाधन, हाटबजार, होटल तथा रेष्टुरेन्ट, ब्युटीपार्लर, सैलुन, शैक्षिक संस्था, ट्युसन सेन्टरलगायतका बन्द रहनेछन्। स्वास्थ्य, सुरक्षा, सञ्चार, विद्युत्, खानेपानी, बैक तथा वित्तिय संस्थालगायत अत्यावश्यक क्षेत्रका सवारीसाधनलाई भने सञ्चालन गर्न दिइने छ।

खाद्यान्न, फलफूल, तरकारी, दूध डेरी, ग्यास पसल बिहान ६ बजेदेखि ९ बजेसम्म मात्रै खोल्न पाइने स्थानीय प्रशासनले जनाएको छ। वैवाहिक कार्यक्रममा भने डिजे तथा ब्याण्ड बाजालाई बजाउनमा रोक लगाइएको छ भने स्वास्थ्य सुरक्षाका मापदण्ड पालना र भौतिक दुरी कायम गरी बढीमा १० जनामा  सिमित गर्ने निर्णय गरिएको छ।