बेलायतले २० लाख डोज कोभिसिल्ड उपलब्ध गराउने

काठमाडौं– बेलायतले २० लाख डोज कोभिसिल्ड खोप कोभ्याक्स कार्यक्रम अन्तर्गत उपलब्ध गराउने भएको छ। अहिले नेपाललाई खोपको आवश्यकता परेको भन्दै बेलायतले उपलब्ध गराउन लागेको हो। विश्‍व स्वास्थ्य संगठनको कोभ्याक्स कार्यक्रम मार्फत खोप (कोभिसिल्ड) उपलब्ध गराउन लागेको हो। 

भारतको सिरम कम्पनीले कोभिसिल्ड उपलब्ध नगराएका कारण पहिलो डोज खोप लगाएकाहरूले अर्को डोज लगाउन पाएका छैनन्। बेलायतले आफैंंले नभई कोभ्याक्स कार्यक्रम अन्तर्गत उक्त सहयोग गर्न लागेको हो। खोपमा बेलायतले दुई पक्षीय सहयोग पनि गर्ने बताउँदै आएको छ। 

नेपाललाई खोप उपलब्ध गराउनेबारे बेलायतको उपल्लो सदनमा बहस भएर निर्णयमा पुगेको हो। यद्यपि यो खोप कुनै कूटनीतिक प्रयास वा त्यहाँ रहेका राजदूतको पहलमा नभई बेलायतमा रहेका गोरखा र काठमाडौँमा रहेका बेलायती राजदूत निकोल पोलिटको सक्रियतामा आउन लागेको हो। दुई दिनअघि पोलिटले प्रधानमन्त्री केपी शर्मा ओलीलाई यसबारेमा जानकारी दिएकी थिइन्।

बेलायती विदेश मन्त्रालयले नेपाललाई तत्काल खोप उपलब्ध गराउने जानकारी संसद्‍मा दिएसँगै निर्णय लिएको हो। यसअघि नेपालले कोभ्याक्स कार्यक्रम अन्तर्गत ३ लाख ४८ हजार डोज खोप प्राप्त गरेको थियो। त्यसमा पनि बेलायतको मुख्य हिस्सा सहयोग थियो।