काठमाडौं– नेकपा माओवादी केन्द्रका अध्यक्ष पुष्पकमल दाहालले बहुमत सांसदहरुको हस्ताक्षरसहित सर्वोच्च अदालतमा रिट दर्ता गरिने बताएका छन्। शनिबार नयाँबानेश्वरमा संयुक्त बैठक सकिएपछि सञ्चारकर्मीहरुसँग कुराकानी गर्दै उनले राष्ट्रपति र प्रधानमन्त्रीको कदम असंवैधानिक, अलोकतान्त्रिक रहेकाले त्यसको कडा प्रतिवाद गरिने बताए।
‘कानुनी रुपले १४९ जना बहुमत सांसदहरुको हस्ताक्षरसहित सर्वोच्चमा जान्छौं,’ उनले भने, ‘हिजो संसद् विघटन हुँदा जसरी प्रतिवाद भयो। अदालतले बहुमत सांसदहरुको हस्ताक्षरसहित रिट निवेदन लिएर गइसकेपछि पुनः संविधानको रक्षा गर्नेछ।’ अदालतले फेरि एकपटक संविधानका पक्षमा फैसला गर्नेमा आफूहरु विश्वस्त रहेको भन्दै उनले यसअघि नै त्यो प्रमाणित भइसकेको बताए।
‘कोरोना महामारी नियन्त्रणमा सबै राजनीतिक दल केन्द्रित हुनुपर्ने बेलामा निरंकुश र तानाशाही प्रवृत्तिविरुद्ध प्रतिवाद गर्नुपर्ने अवस्था आएको छ, ’उनले भने, ‘स्थानीय तहसम्म नै यो कदमविरुद्ध कडा प्रतिवाद सुरु हुनेछ।’