सुर्खेत– एम्बुलेन्स आउला भनेर पर्खंदापर्खंदै सल्यानमा एक जना बिरामीको मृत्यु भएको छ। मृत्यु हुनेमा बनगाड कुपिन्डे नगरपालिका–७ का भोलाबहादुर बुढा छन्। श्वासप्रश्वासमा समस्या देखिएपछि उनलाई बिहीबार राति ११ बजेतिर नगरपालिकाको आइसोलेसन पुर्याइएको थियो।
तर स्वास्थ्यकर्मीले त्यहाँ बिरामीको उपचार असम्भव भन्दै जिल्ला अस्पताल वा प्रदेश अस्पताल सुर्खेत लैजान भनेका थिए। त्यसपछि एम्बुलेन्स बेलाइएको थियो। समयमै एम्बुलेन्स नआाउँदा उनलाई उपचार गर्न अन्यत्र लैजान सकिएन। उनको शुक्रबार बिहान मृत्यु भएको हो।
कोरोनासँग मिल्दोजुल्दो लक्षण भएका बुढाको पीसीआर परीक्षणका लागि स्वाब सुर्खेत पठाइएको छ। मृतकका आफन्तले नगरपालिकाले समयमा एम्बुलेन्स उपलब्ध गराउन नसक्दा बिरामीले अकालमा ज्यान गुमाउनुपरेको आरोप लगाएका छन्। ‘बिरामीलाई अस्पताल लैजान एम्बुलेन्स खोज्यौंं तर एम्बुलेन्स चालकले स्वास्थ्य शाखाको अनुमति विना बिरामी नबोक्ने अडान लिए’, मृतकका बहिनी भुमा वलीले भनिन्, ‘एम्बुलेन्स कुर्दाकुर्दै दाजुको मृत्यु भयो।’
नगरपालिकाको आफ्नै एम्बुलेन्स छ। आफन्तले बिहीबार राति नै एम्बुलेन्स चालक दलवहादुर पुन र स्वास्थ्य शाखा संयोजक बासुदेव पोख्रेलको घरमा पुगेर बिरामीलाई अस्पताल पुर्याउने वातावरण मिलाइदिन आग्रह गरेका थिए। तर स्वास्थ्य संयोजक पोख्रेलका परिवारले भने उनी घरमा नभएको भन्दै आफन्तलाई फर्काइएका थिए। बिरामीको मृत्युपछि आफन्तले पोख्रेलमाथि कारबाहीको माग गर्दै नगरपालिकामा नाराबाजी गरेका थिए।
स्वास्थ्य संयोजक पोख्रेलले आफ्नो गल्तीका कारण बिरामीको मृत्यु भएको स्वीकार गरेका छन्। ‘मृतकका सदस्यबाट बिहीबार राति पटक–पटक फोन आएको थियो। मैले फोन उठाएको थिइनँ। घरमै आएर बोलाउँदा पनि जवाफदेही नभएको हुँदा मेरो गैरजिम्मेवारपूर्ण व्यवहारका कारण बनगाड कुपिन्डे नपा–७ घर भई हाल बनगाड कुपिन्डे–१ सल्लीबजार बस्ने बर्ष ४९ का भोलाबहादुर बुढाको मृत्यु भएकोप्रति ध्यानाकर्षण भएको छ। मेरो यस्तो व्यवहारप्रति क्षमायाचना चाहन्छु’, पोख्रेलले विज्ञप्तिमा भनेका छन्, ‘आगामी दिनमा यस्तो गल्ती पुनः नदोहोरिनेसमेत प्रतिबद्धता जाहेर गर्दछु।