विराटनगर - मोरङको सुन्दरहरैचामा एक पुरूषको विभत्स हत्या भएको छ। घरमा एक्लै बस्दै आएका सुन्दरहरैचा नगरपालिका–३ लोचनीका एक पुरुषको सुतेकै ओछ्यानमा विभत्स हत्या गरिएको अवस्थामा शव फेला परेको हो।
धारिलो हतियारले घाँटीको अगाडिको भाग क्षतविक्षत पारिएको अवस्थामा ४० वर्षीय विष्णु ऋषिदेवको शुक्रबार बिहान शव भेटिएको हो।
मोरङ प्रहरीका प्रवक्ता डीएसपी मानबहादुर राईका अनुसार घाँटीमा धारिलो हतियारले प्रहार गरेर हत्या गरिएको अवस्थामा शव फेला परेको हो।
गछिया खोला छेउको ऐलानी जग्गामा टिनको छानो भएको र टाटीको बेरा लगाएर बनाइएको झुप्रोमा विष्णु एक्लै बस्दै आएका थिए। उनकी श्रीमतीको मृत्यु भइसकेको र छोराछोरी पनि घरभन्दा बाहिर नै बस्ने गरेको पाइएको प्रहरीले जनाएको छ।
घटनाको प्रकृति हेर्दा निदाएको अवस्थामा धारिलो हतियारले घाँटीको अगाडिको भाग काटेर हत्या गरिएजस्तो देखिने डीएसपी राईको भनाइ छ।
बिहान अवेरसम्म पनि उनी काममा ननिस्किएपछि बोलाउन गएका साथीहरूले घरभित्रै खाटमा हत्या गरिएको अवस्थामा शव देखेर प्रहरीलाई खवर गरेको डीएसपी राईले जानकारी दिए।
घटनाको अनुसन्धानका लागि मोरङ प्रहरीका डीएसपी मञ्जील मुकारुङको नेतृत्वमा विशेष टोली परिचालन गरिएको बताए।