बाँकी रहेको कोभिसिल्ड खोप दोस्रो डोज छुटेका फ्रन्टलाइनरलाई

काठमाडौं– सरकारले कोभिडविरुद्धको मौज्दात रहेको खोप कोभिसिल्ड खोप प्राथमिकतामा परेका तथा दोस्रो मात्रा लगाउन छुटेका स्वास्थ्यकर्मी, सुरक्षाकर्मी र सरसफाइकर्मीलाई दिने निर्णय गरेको छ।

२३ फागुनअघि पहिलो प्राथमिकतामा परी खोप लगाएका तर दोस्रो मात्रा लिन छुट भएका व्यक्तिले समेत अब खोप पाउनेछन् । 

स्वास्थ्य सेवा विभागले पहिलो प्राथमिकतामा परेका दोस्रो मात्रा लिन छुट भएका व्यक्तिहरुलाई जिल्ला कोभिड १९ खोप समन्वय तथा अनुगमन समितिबाट निर्णय गरी उपयुक्त समय निर्धारण गरी खोप सेवा सञ्चालन गर्न निर्देशन दिएको छ। बुधबार व्यवस्थापन महाशाखा टेकुले, सातै वटै प्रदेश स्वास्थ्य निर्देशनालय, प्रदेश स्वास्थ्य आपूर्ति केद्र ७७ वटै जिल्ला स्वास्थ्य कार्यालयलाई पत्र लेख्दै विभागले उक्त निर्देशन दिएको हो ।

अहिलेसम्म नेपालमा कोभिसिल्ड र भेरोसेल गरी पहिलो मात्रा खोप लिनेको संख्या २१ लाख बढी छ। दोस्रो मात्रा लिनेको संख्या ७ लाख नाघेको छ। अहिले विभिन्न जिल्ला तथा प्रदेशमा कोभिशिल्ड खोप ९० हजार हाराहारीमा मौज्दात छ।