महन्थपछि उपेन्द्रको काउन्टर पत्र : दलको नेता चयन भएको छैन

काठमाडौं– जसपा संसदीय दलको नेता चयन भएको सम्बन्धी अध्यक्ष महन्थ ठाकुरले संसद सचिवालयमा पत्र पठाएलगत्तै अर्का अध्यक्ष उपेन्द्र यादवले पनि काउन्टर पत्र पठाएका छन्। आजै दुई अध्यक्षबीच पार्टी एकताको आह्वान भएको संयुक्त वक्तव्य आएको केहीबेरमा नै पत्रयुद्ध शुरु भएको हो।

महन्थ ठाकुरले संसदीय दलको नेता राजेन्द्र महतो चयन भएको पत्र संसद सचिवालयमा पठाए लगत्तै उपेन्द्रले यादवले पनि संघीय संसद सचिवालयलाई पत्र लेखेर कुनै दलको नेता चयन नभएको प्रष्ट पारेका छन्।

‘जनता समाजवादी पार्टी, नेपालको अन्तरिम विधान २०७७ को धारा २८ को उपधारा (२) मा पार्टीको संघीय संसदीय दलको आफ्नै विधान हुने र उपधारा (३) मा केन्द्रीय कार्यकारिणी समितिबाट संसदीय दलको विधान अनुमोदन हुनुपर्ने व्यवस्था भएकोमा हालसम्म पार्टीको संसदीय दलको विधान नबनेको र केन्द्रीय कार्यकारिणी समितिबाट अनुमोदन पनि नभएको व्यहोरा जानकारीका लागि अनुरोध छ,’उनले पठाएको पत्रमा भनिएको छ।

यादवले पार्टीको संसदीय दलको बैठक बसी नेता चयन भएको भनी केही सञ्चार माध्यमहरुमा भ्रमपूर्ण प्रचार भएकाले संसदीय दलको विधान समेत पारित नभएको अवस्थामा कसैले संसदीय दलको नेता चयन भएको भनी सचिवालयमा जानकारी दिएको भए त्यस्ता अवैधानिक कार्यलाई मान्यता प्रदान नगर्न अनुरोध गरेका छन्।