काठमाडौं– नेपाली कांग्रेसका उपसभापति विमलेन्द्र निधि र नेपालका लागि युरोपियन युनियनका राजदूत नोना डिप्रेबीच मंगलबार भेटघाट भएको छ।
उपसभापति विमलेन्द्र निधिको निवास नयाँ बानेश्वरमा बिहान भएको करिब एक घण्टा लामो भेटमा राजदूत डिप्रेले नेपालमा कोरोना महामारी नियन्त्रणमा इयूका तर्फबाट सहयोग गर्ने बताएकी छन्।
भेटमा राजदूत डिप्रेले प्रदेश नम्बर २, कर्णाली प्रदेश र सुदूरपश्चिम प्रदेशको विविध विकासमा आफूहरुले सहयोग गर्ने पनि बताएकी छन्।
उनले वैकल्पिक उर्जा, जलवायु परिवर्तन, लैंगिक समानता लगायतका क्षेत्रमा इयूले गर्न चाहेको सहयोगबारे पनि उपसभापति निधिसँग कुरा गरेकी छन्। भेटमा उपसभापति निधिले नेपालको विकासमा इयूले सहयोगका लागि राखेको रुचिका लागि धन्यवाद व्यक्त गरेका थिए।