काठमाडौं - खेलको अन्तिम समयमा इडेन हजार्डले गोल गरेपछि घरेलु मैदानमा रियल मड्रिड हारबाट जोगिएको छ।
स्पेनिस ला लिगाअन्तर्गत आइतबार राति सम्पन्न खेलमा रियल मड्रिडले पाहुना टिम सेभियासँग २–२ गोलको बराबरी गर्दै हारबाट जोगियो।
रियलका लागि मार्को एसेन्सिया र हजार्डले गोल गरे भने सेभियाका लागि फरनान्डो र राकिटिकले गोल गरे।
खेलको २२ औं मिनेटमा राकिटिकले फिड गरेको बललाई सदुपयोग गर्दै फर्नान्डोले रियलको पोस्टमा गोल गरेका थिए। यससँगै पहिलो हाफमा सेभिया एक गोलले अघि रह्यो।
दोस्रो हाफको ६७ औं मिनेटमा टोनी क्रुसको पासमा रियलका एसेन्सियोले गोल गरेका थिए। यससँगै खेल बराबरीमा भने आयो तर लामो समय टिकेन। ७८ औं मिनेटमा पाएको पेनाल्टीको अवसर सदुपयोग गर्दै रोकिटिकले नै गोल गरे।
त्यसपछि खेलमा पुनः सेभिया हाबी भयो। निकै प्रतिस्पर्धात्मक बनेको खेलको इन्ज्युरी समयमा टोनी क्रुसको पासलाई सदुपयोग गर्दै हजार्डले गोल गरेका थिए।
यो बराबरीसँगै तेस्रो स्थानको रियल दोस्रो स्थानमा उक्लिएको छ। चौथो स्थानको सेभिया भने यथावत् छ। रियल र बार्सिलोनाको समान ७५ अंक छ भने शीर्षस्थानको एट्लेटिको मड्रिडको ७७ अंक छ।
सेभिया ७१ अंकका साथ चौथो स्थानमा छ।