विराटनगर– कोरोना संक्रमणको बढ्दो जोखिमलाई दृष्टिगत गरी स्थानीय प्रशासनले वैशाख २४ गते रातिदेखि जेठ १ गतेसम्म जिल्लाभर निषेध आदेश लगाउने निर्णय गरेको छ। डिसीसीएमसीको बिहीबार बसेको बैठकले जिल्लाभर निषेध आदेश लगाउने निर्णय गरेको मोरङका प्रमुख जिल्ला अधिकारी कोशहरि निरौलाले बताए।
स्थानीय प्रशासन ऐन २०२८ को दफा ६ को उपदफा ३ र संक्रामक रोग ऐन २०२० को दफा २ बमोजिम निषेध आदेश जारी भएको हो। डीसीसीएमसीको बैठकले अस्पताल तथा आइसोलेसन सेन्टरमा डाक्टर, नर्स र अहेबसहितको टिम तथा एन्टिजेन र अक्सिजनको व्यवस्था मिलाउने निर्णय गरेको छ।
कोभिड–१९ महामारीको रोकथाम तथा न्यूनीकरणका लागि व्यापक रुपमा जनचेतनामूलक कार्यक्रम सञ्चालन गर्ने, स्वयंसेवक परिचालन गर्ने र आ–आफ्नो क्षेत्रभित्र आवश्यकताअनुरुप निःसंक्रमण र निर्मलीकरणको व्यवस्था मिलाउने निर्णय भएको प्रमुख जिल्ला अधिकारी निरौलाले बताए।
यसअघि वैशाख १८ गते रातिदेखि मोरङका विराटनगर, बुढीगंगा, जहदा र कटहरीका १ देखि ४ नम्वर वडासम्म ७ दिने निषेध आदेश जारी गरिएको थियो।